|
|
| #11  30th July 2008, 06:03 PM | ||||
| ||||
| كايداهم يا أوختشى.. الكلام اللى بتقوليه ده خطير جداً وتطير فيه رقاب.. الظاهر إنك زى حرمنا المصون.. من النوع اللى لما تيجى سيرة الدين والأصالة تخشعى على طول بدون عقل.. وكل الثقافة والهاى إيديوكيشن يبقى سلاح لتبرير التخلف طالما فى الموضوع مسحة من شيخ ولا قسيس.. لاااااااااااااااااا.. مابياكلش معانا الكلام ده وماعادش ينفع كلام.. هوه ايه بالظبط اللى حرية شخصية؟ هيه الأطفال دى بنشتريها من المول ولو طلع فيها عيب صناعة نستبدلها بالضمان؟ الأطفال دى مش مقتنيات يا جماعة.. ومش مملوكين لوالديهم علشان بالبساطة دى يجيبوا أو مايجيبوش عيال براحتهم.. الأطفال دول كائنات حية.. بشر.. إنسان.. وأقذر وأسخف وأجبن حاجة بنعملها إننا نجيب إنسان إلى هذا العالم القمئ دون رغبته وإختياره هوه.. الوحيد اللى ليه "حرية شخصية" هوه الجنين اللى ماتولدش لسة.. وكون الأب أو الأم بياخدوا هما القرار لأنه لسة ماتولدش معناه مسؤولية عليهم مش حرية شخصية ليهم.. بصى لحال مصر يا كايداهم بواقعية شوية.. ماتبصيش للى بيودى إبنه ولا بنته مدارس لغات لأنه قادر ومقتدر.. ده مفيش مشكلة معاه ولا منه لأنه يقدر يصرف عليهم أحسن صرف وأحسن تعليم ويوظفه فى أحسن وظيفة.. ماتبصيش حتى لأب وأم فقراء ومثقفين وعاقلين وخلفوا طفل واحد (قد قدرتهم الإقتصادية) وودوه مدرسة حكومى على قدهم وأصقلوه فكرياً وعلموه إزاى يكون عصامى ويكون نفسه ويكون عزيز النفس وعنده إباء وشرف.. دول مش هما المشكلة.. ومافيش مشاكل تيجى من دول.. لكن شوفى التشرد والجهل والتخلف وكام واحد نايم تحت الكبارى وكام متسول وشحات وطفل بيبيع مناديل فى الإشارات.. عدى عدد العيال دى بالنظر كدا.. وبعديها جاوبينى ده لما يوصل سن 20 ولا 30 بيكون سب الدين لأبوه وأمه كام مرة لأنهم جابوه فى الدنيا دى! دول اللى ليهم الحرية الشخصية فعلا.. واللى بيثبتوا إن قرار أبوهم وأمهم كان غلط!! والموضوع بنظرة جماعية كمان ماينفعش يكون قرار شخصى.. والدول اللى زى الصين دى ناس بتفكر وبضايعها غزت العالم كله ومعندهاش أزمة إقتصادية دلوقتى بسبب تفكيرها ده.. الدولة مواردها ثابته.. مش بتزيد غير بزيادة الطاقة الإنتاجية مش بزيادة العدد.. زيادة العدد مضرة.. لأن حصيلة الموارد دى بتتقسم على الأفراد دى.. كل ما زاد عدد الأفراد كل ما قلت حصة الفرد منهم.. يعنى بقى أفقر.. لو فرضنا إن الدولة بتصرف مليار جنيه على دعم رغيف العيش.. فإحنا لو مليون واحد فالنفر هايوصله بعشرة جنيه عيش مدعوم قبل ما يبتدى يشترى من بره على حسابة عيش إستثمارى.. لو كنا عشرة مليون فمش هايوصلنى غير بجنيه واحد عيش قبل ما أشترى من بره.. يعنى كل نفر بيزيد فى البلد دى.. بياخد من نصيب إبنى.. يبقى حرية شخصية إزاى؟؟ ناس تخلف بالعشر أطفال لأنها سايباها على الله.. وأنا ياللى باشغل دماغى وهمى على البلد أشربها بسببهم؟ دول ناس أنانيين جداً ومش بيفكروا أبعد من مناخيرهم.. تبقى حرية شخصية منين وزيادة عياله بتضرنى؟ عايزة تبقى حرية شخصية بجد؟ يبقى الناس تبطل تسول.. سواء من الغير أو من الدولة أو من الله نفسة.. يعنى اللى يخلف واحد يخلف عشرة يخلف عشرين براحته خالص.. بس يصرف عليهم ومالوش مليم دعم.. مايشتريش عيش من الفرن ومايوديهمش مدارس حكومى.. خلاص مستوى الخدمات الحكومى بقى زى الزفت ومش ناقصة الصراحة عدد جديد فى نفس الفصل بنفس الإمكانيات الضايعة أساسا.. واللى يفنجر يفنجر من جيبه (مثل شعبى مفيد أهو) أنا مستعد أساند أى حملة تطالب بإن الدعم يكون لأول طفلين فقط.. بعد كدا لا المجتمع ولا الدولة يصرف مليم واحد على أى كائن جديد.. (بس مش فى عهد حكومتنا الحالية علشان ماديهاش سبوبة جديدة) ومستعد كمان أساند أى حملة تطالب بتبرأة كل من وصل لسن الرشد وقتل أبويه مجتمعين أو منفردين رفضاً منه لإنجابه فى هذه الأسرة ليتذوق العلقم ويتسول فى الإشارات.. ونعتبر تصريح القتل ده بمثابة إلغاء التوكيل اللى ماعملوش ليهم فى السهرة اللى كانت نتيجتها إنهم خلفوه غصب عنه.. فى دول العالم المتحضر لو عاملت إبنك بقسوة وطحت فيه ضرب.. يسحبوه منك لأنك مالكش حق فى كدا.. وإحنا بنعتبر الخلفة بدون سؤال الطفل حرية شخصية! إقتباس:
كان فيه حديث عن رسول الإسلام بيوضح القضية دى.. كان واحد معاه ناقة (أنثى الجمل).. وهايسيبها بره وداخل حتى يقضى مصلحة ما.. فسأل الرسول سؤال.. يا رسول الله هل أعقلها (أربطها علشان ماتمشيش) أم أتوكل على الله وأتركها؟ فأجابه الرسول بالحديث المعروف: "أعقلها وتوكل" طبعاً مفروغ منه ضمناً إن لو الراجل ساب الجمل من غير ما يربطه وتوكل على الله.. فده نوع من الهبل.. مش فاهم الناس إزاى مش قادرة تقيس إنها لو إتكلت على الله بدون حسابات تسبقها.. فده نوع من الهبل.. نرجع تانى لنقطة الصفر.. المؤمن المفكر قرب ينقرض خلاص.. إما مؤمن أهبل سايب الجمل من غير ما يربطه إتكالاً على الله.. وإما كافر عاقل رابط الجمل لأنه معندوش الله ده فى قاموسه علشان يتكل عليه.. فى النهاية فالأولانى الجمل بتاعه هايسرح (وبرضه هايخترع لمصيبته إفتكاسة دينية هبلة زى إن ده إبتلاء من الله ويستعوض ربنا فى الجمل) بينما التانى الجمل بتاعه قاعد مكانه وماسرحش لأنه مربوط وفى قرارة نفسة بيسخر من هبل الدينيين وبيقول الأديان جابتهم لورا.. بالمناسبة.. أنا لا أجرؤ على لومه إن قال هذا لأن ببساطة معاه حق.. عمو سقراط يا جلاب الخير كله.. مكنش قريت مداخلتك بعناية.. لكن فى النهاية إكتشفت إنى أعدت تكرار نفس مداخلتك دون أن أدرى.. عموما طريقة التبسيط بالتفصيل الممل بتاعتى إحتمال تزود دائرة الفاهمين بدل ما تكون مجرد تكرار تأييدى.. ويا عمو جريج أنا فاهم إنك ماقلتش.. منين جالك إنك مش معايا فى نفس الخندق وباكلم ناس غيرنا.. بص.. بخصوص الأمثال بل وحتى الآيات الدينية الصريحة الصادرة من رجال دين.. إسمح لى أقول الآتى على بلاطة.. أى مسيحى قرأ فى الإنجيل بتاعه قصة "التجربة على الجبل" وماتعلمش منها إن الشيطان نفسه ممكن يلكؤ الأيات المقدسة لإستغلالها فى حاجات الآيات منها بريئة.. يبقى مسيحى حمار مأخدش باله من أهم درس فى التجربة على الجبل.. أما لو أخد باله فساعتها مش بيهمه إن دى آيات وقايلها قسيس.. أى مسلم قرا فى التفاسير حول "سورة النجم" وماتعلمش منها إن الشيطان نفسه ممكن يعطى كلمات ذات إيحاء قرآنى (إنخدع فيه حتى رسول الإسلام نفسه) لإستغلالها فى حاجات ضد الإسلام نفسه.. يبقى مسلم حمار مأخدش باله من أهم درس فى التفسير ده.. أما لو أخد باله فساعتها مش بيهمه إن دى آيات أو أحاديث وقايلها شيخ.. خلاص.. زمن إلتماس الأعذار للى مش مشغل عقله إنتهى خلاص.. التماس الأعذار للبساطة والسطحية والنية الطيبة ودانا وودى البلد كلها فى 60 داهية من زمان.. يعنى خلاصة القول إن الناس هيه اللى هبلة وبتسمع لكلام مايتعقلش ومش بتفكر فيه لمجرد إنه طاله من رجل دين.. وراد جدا يطلع لك قسيس ولا شيخ ويقول اللى عايزه.. محدش مفترض العصمة أو حتى ديمومة صحة الرأى فى الناس دى.. الخطأ كل الخطأ فى إنى أسمع الكلام فاطيع بغباوة من غير ما أفهم ولا أحلل ولا أناقش.. __________________ نحن نثق فيمن لا نعرفهم لأنهم لم يخدعوننا من قبل.. حُرّر بواسطة Mirage Guardian : 30th July 2008 في الساعة 06:13 PM.  |
| #12 30th July 2008, 08:57 PM | ||||
| ||||
| خبر ذا علاقة بالموضوع تسعة توائم والحكومة المصرية -ممثلة في وزارة الصحة- تسارع إلى توفير كافة السبل وتتكفل باحتياجاتهم لعامين نقرأ الخبر وسوف نجده مادة ثرية بالنقاش حول مداخلة زمليتنا " كيداهم " الأخيرة .... إلى مابعد القراءة __________________ في عينيكي حقيقة وأنا كدبة بـــريئة ترحل في دقـــيقة ..... إسمها إنسان |
| #13 30th July 2008, 09:24 PM | ||||
| ||||
| ما أسخم من أخبار سقراط إلا أخبار رحيل.. والله ما قصرت إنت ولا هوه!! كل ده واسمها "غزالة"؟ أمال لو كان اسمها "أرنبة" كانت جابت كام عيل فى بطن واحدة!! إتفضلوا يا سادة: إقتباس:
وتلاقى أصل القصة إن أطفالها التلاتة اللى فاتو كانو بنات.. والراجل نفسة فى مولود ذكر يشيل اسمه.. وهيه طبعا لازم تجيب له الدكر وتخلى فقرهم دكر! وغالباً ربنا حب يعاقبها على طمعها وعدم رضاها وهيه عندها 3 عيال.. فراح عاطيها من وسع وإبسطها يا بااااسط! تششششششش (صوت الملوخية وهيه بتتدلق على عبسلام النابلسى) كفااااية.. ماتبسطهاش أكتر من كدا.. ماهو مش دايماً المال والبنون زينة الحياة الدنيا.. أحيانا بيكون المال لعنة على صاحبه.. وغالباً (مش أحيانا) العيال بتكون مصيبة سوده لو بتعيط وإنت معندكش.. طبعاً أم التسعة دى إستحالة ترضع رضاعة طبيعية وإلا يجيلها جفاف!! يعنى العيال هاتعيط هاتعيط.. وهيه معندهاش.. ماهى مش منابع النيل ولا موسم الفيضان علشان ترضعهم! وجوزها.. المنحوس ده.. كان شارب إيه ولا واكل إيه وبيتعاطى ايه فى الليلة السوده اللى قرر يخلف فيها فحصل الإنقسام الثنائى المركب ده اللى وصل الجنين لتسعة أجنة! أهم هايجنهوه بمعرفتهم لأنهم هايقضوا على الأخضر واليابس.. جفاف للأم يتبعه جفاف فى جيوب الأب نتيجة شراه لبن صناعى لدستة إلا ربع من الأطفال.. شر البلية ما يضحك فعلاً.. وربنا يعينهم فعلاً.. ويرحمنا احنا برحمته علشان الدنيا مابترحمش.. __________________ نحن نثق فيمن لا نعرفهم لأنهم لم يخدعوننا من قبل.. |
| #14 31st July 2008, 02:30 AM | ||||
| ||||
| إقتباس:
الناس اللى بتخلف عيال بلا تفكير عايشين حياتهم كلها بالشكل ده يعنى منهج حياه وبالتالى لو حتى حطيت عسكرى الأمن المركزى مش هينفع هى الدنيا مش فارقه معاهم أساسا ومهما إتكلمت بالعقل مش هينفع وطبعا دى عقول خصبه لنظرية المؤامره لقطع نسل المسلمين لكن مثلا فى فتوى سمعتها على قناة إقرأ إن تحديد الإنجاب من عدمه لازم يكون قرار مشترك من الزوجين بدون تفرد أحدهما بالقرار بدون علم الآخر أو عمل جراحه تمنع الإنجاب بشكل نهائى إلا فى الحالات التى تستوجب هذا صحيا بذمتك سمعت حد بيروج للفتوى دى ؟ طبعا لأ طب ليه ؟ لأنها لا تخدم أى طرف من الأطراف اللى يهمها البهارات على كل حاجه وعلى فكره الفتوى دى من أكتر من مفتى بس مش من بتوع الفضائيات اللى نصهم ماشى على لا تناقش ولا تجادل يا على والنص التانى ماشى على إن البوس جائز ما بين الستات والرجاله الأغراب عن بعض ما دام برىء  Doubleposting merged by ”Tifnout”, an Artificial Intelligent Robot to Prevent Flooding أولا أطفال الشوارع اللى بيشمو الكلا تحت الكبارى مش بس نتاج العدد دول كمان نتاج رجاله كتير مش عارفه الفرق بين الدكر و الراجل بمعنى دكر أى حيوان ممكن يخلف بس راجل البشر هو اللى بيربى وده لو مخلف واحد زى عشره مش هيربيهم بس كمان عايزه أفهمك حاجه أنا والدى خلفنا 5 وكنا فى مدارس خاصه فى إبتدائى وإنتقلنا للحكومه فى إعدادى وثانوى لأن أياميها كلن الخاص للفشله وهو مدخلناش الخاص لأنه غنى ولكن لأنه كان عنده رغبه فى تأسيس ولاده كويس فى حين إن واحده جارتنا إتطلقت لأنها خلفت بنت معاقه و أتبعتها بولد ومات وجوزها الحقيقه أحاسيسه المرهفه لم تتحمل الخلاصه إن فى واحد بيتحمل مسئولية أفعاله (راجل) وواحد بيهرب ( دكر) وطبعا هى حريه شخصيه ده اللى ناقص بكره أصحى ألاقى قانون بيقولى أنام مع جوزى سبت وتلات ويخيرنى ما بين اللوب ولا الحبه وبعدين ألاقى القسم باعتلى إستدعاء على يد محضر بيقولى نرجو التفسير يوجد حبه زائده فى العلبه نسيتى أنهى يوم يا متهمه وهل المنيل جوزك كان موجود ويجيبولى ماما كريمه تأكد حملى من عدمه تغنيلى أوعى يا شابه تنسى الحبه كده لا مؤاخذه أبقى متجوزه وزارة الداخليه مش جوزى ده غير إنك فى فورة إنفعالك نسيت كلمه انا قولتها إن ربنا إدانا عقل أنا لم أدعو للخلفه بلا تفكير بس كمان واحد زى اللى خلفت كل التوائم دى هل المفروض تقول للدكتور إقتل 2 أو 3 لأنى ما كونتش عامله حسابهم أظن دى من المواقف اللى ما بيتعملش حسابها إلغاء دور الله فى حياتنا إلحاد يناسب الملحدين وأنا أؤمن جدا بتصاريف الله التى تكون دائما للخير ولا يختلف عنى أى مسيحى متدين __________________ أن تنتقد الفكر هذا حقك أن تنتقد صاحب الفكر تصبح حمار برأس عجل |
| #15 1st August 2008, 03:03 AM | ||||
| ||||
| اللى عجبنى فى مجمل التراسيخ اللى الأستاذ عاوز يرسخها. إقتباس:
ده اللى نتكلم فيه صح وهو الأساس انى أبنى مجتمع صح مش مجرد مجموعات من النمل ماشية والسلام،ولا عندها ثقافة مجتمعية أو حتى ثقافة فكرية. ده اللى نفكر فيها ونتحرك مش مجرد شعارات ونمشى وراها طول النهار واخر اليوم كل واحد يرجع على بيته ينام وتقوله بتعمل ايه اصلى كنت بعمل حملة لترشيد الاستهلاك وتلاقى جلدة الحنفية عنده فى المطبخ كفران أبوها لما طفحت الدم والحنفية بتنقط. الله أومال انت منين بتعمل حملة ومن الناحية التانية هامل بيتك وحنفية بيتك وأسرة بيتك  مش هضيف جديد مسألة تحريم التحديد والتنظيم مش جديدة ويا ما كتير نزلوا فتاوى وكفروا ناس لإتباعهم فكرة التحديد أو التنظيم بغرض أنها تمنع مشيئة الله ...................الخ كتير بيعملوا حملات وخاصة على الانترنت المجال واسع للجميع ،زى حملة أنا مش مزة وأنا أدون لأجل مين وحملة إلا صلاتى ...........الخ ده كمان. المهم من بين ده كله هل نجحت الحملات دى أو حتى اتنفذت على أرض الواقع طبعا لأ!! لأنها مجرد خيالات وشطحات من بعض الناس وخاصة شباب مش عارفين حجم المسئولية كويس،وبعضهم منساق خلف دعاوى وفتاوى ما أكثرها هذه الأيام. الحمله الموجودة دلوقت،هل اللى طرحها درس جميع جوانبها،من سلب وإيجاب؟ هل شاف ان الكلام اللى سمعه صح؟ طبعا كل ده مؤكد مافكرش فيه أصلا مجرد تغييب للعقل ليس إلا،ومش بعيد يكون اللى طرح الحملة أسرته حوالى 4 أو 5 اخوات غير الأب والأم وأبوه مش عارف يصرف عليه كويس. أفتكر أيام ما كانت إعلانات التوعية زمان فى التفزيون يمكن كانت اكتر واقعية من الشعارات المختصرة بتاعت إعلانات اليومين دول. بتاع الست كريمة وحواراتها مع الستات،كان كلام بصدق مش مجرد هيئة عاوزة تقلص عدد المواطنين لأ ده توعية علشان الصحة بتاعت الناس،صحة الأم والجنين اللى هما اكتر اتنين متبهدلين. الحمله فى إطارها تابوه متكرر لكن هل ممكن يكون له تأثير؟؟؟؟ تعليق من ضمن التعليقات على الموضوع الأصلى فى منتدى المبرمجين. إقتباس:
الجزء المظلل بالأحمر هو بالفعل الجزء المهمل لدى وزارة التخطيط المصرية |
| #16 1st August 2008, 03:24 AM | ||||
| ||||
| طب أنا لمست مصيبه ما كونتش مركزه فيها قبل كده إن الكلام واخد منحنى إن اللى معاه فلوس يصرف فده من حقه يخلف واللى ممعاهوش ميلزموش التربيه مش أكل وشرب ولبس وبس لو لم يكن الأب والأم على إستعداد لتربية الطفل نفسيا وعقليا وعاطفيا بشكل صحى فتربيته بدنيا ليس لها لزوم فى ناس تقدر تربى 7 و8 من كل النواحى بس دول لما يكون فلوس بيكون معاهم حق ومافيش حد يقدر يفتح بؤه صحيح سقراط لما قال الفلوس الفلوس كل شىء يجى بالفلوس لم يكذب __________________ أن تنتقد الفكر هذا حقك أن تنتقد صاحب الفكر تصبح حمار برأس عجل |
| #17 1st August 2008, 12:22 PM | ||||
| ||||
| اكتر حاجة غريبة فى الموضوع الكلام عن الموضوع كإتجاة قومى علشان الموارد اللى بتقل بالنسبة للزيادة السكانية اى موارد واى خدمات بتتضائل بالنسبة لاولادنا فى ظل الزيادة السكانية خلينا نتكلم عن خدمتين متوفرين فى بلدنا لينا ولولادنا التعليم المجانى مين قال ان التعليم مجانى احنا لو نظرنا للموضوع بعمق اكتر هنلاقى الاب والام بيصرفوا على اولادهم اموال مهولة من اولى ابتدائى لحد الليسانس او البكالريوس ودة بس فى الدروس الخصوصية يبقى انهى تعليم مجانى اللى هحافظ لابنى على مكان فية الصحة مين قال ان الناس على اختلاف مستواياتهم المادية مش بيتابعوا مع الدكاترة فى العيادات مثلا يعنى فى محافظتى المستشفى المركزى اللى المفروض تكون مجانى او الكشف فيها بسعر بسيط االتذكرة بعشرة جنية وعيادة الدكتور بتتراوح بين 15 الى 25 جنية ويا ريت المستشفى فيها دكاترة ولا امكانيات ولا اهتمام يبقى انا هاروح فين اكيد هشد الحزام شوية كأسرة على قد حالها واروح العيادة دول بس كمثالين للخدمات اللى المفروض نقلل النسل علشان يتوفروا لولادنا علشان حياة كريمة طبعا انا مع تنظيم الاسرة جدا بس بلاش نقول اتجاة قومى والكلام اللى ما لوش لازمة دة انا هاقول اتجاة شخصى يعنى انا عندى امكانية اربى طفلين يبقى كفاية اوى والامكانية دى بتبقى مادية وصحية وغيرها او لو عندى امكانية اربى خمس اطفال ما فيش مشاكل بس الدولة مش تيجى تعمل وصى علية وتقولى كفاية اتنين علشان يتوفرلهم حياة كريمة تحت سماء بلدنا ويطلع فى الاخر وهم وانا اللى يطلع عينى فى الصرف عليهم وبعدين انا بشوف ان كل واحد ادرى بحالة وفى فقهاء ما انكرتش موضوع تنظيم الاسرة يرى الغزالي أن منع الولد مباح، ولا كراهية فيه؛ لأن النهي يعتمد على أحد الأدلة الشرعية، وهو غير متوفر في هذا الموضوع. واعتبر، أن في الإباحة أصل يمكن القياس عليه، وهو ترك الزواج عند عدم المقدرة، وذلك في قوله تعالى: ﴿ليستعفف الذين لا يجدون نكاحاً حتى يغنيهم الله من فضله﴾ __________________ I have nothing if I havenot you |
| #18 11th August 2008, 11:45 AM | ||||
| ||||
| صباح الخير agony أولاً أنا أسف على التأخير ثانياً الجزء الديني في الموضوع مش قليل ومنقدرش نهمله المشكلة مش أن الموضوع ديني بس المصيبة زي ما أنت بتقول في مدي التفكير الذي وصل اليه طلاب صفوة الكليات الناس اللي المفروض أنها فاهمه مش حافظه المصيبه أنهم طلعوا حافظين مش فاهمين وأول ما تيجي سيرة الدين ينزل الخشوع دون محاولة إعمال عقلهم في الأمر وياريتهم مثلاً معتمدين علي نصوص دينية لكن الإعتماد كله على فتاوي جاهزة يعني حتى مش عايزين يفكروا وسايبين غيرهم يفكرلهم وياخدوا اللى بيتقالهم على أنه كلام مقدس وليس كلام بشر يحتمل الصواب أو الخطأ من الأخر المشكلة في تأليه البشر دول وإعتبار كلامهم هو كلام الله بدون تفكير ممكن ده يكون حال ناس جهله ماتعلموش وتفكيرهم على قدهم (مش دايماً طبعاً) لكن إزاي ده يكون فكر ناس متعلمه وهكرر دول ناس مبرمجين يعني مفترض أنهم بيوزنوا الكلام كويس (أي مبرمج عارف كويس أن حرف زايد كده بدون حساب ممكن يعمل مصيبة) __________________ "كثيراً ما تكلمت وندمت أما عن السكوت فلم أندم قط" - أنبا أرسانيوس |
| #19 16th September 2008, 02:17 PM | ||||
| ||||
| إقتباس:
ثانياً أعتذر عن تأخري في الرد على kaydahom ثالثاً بأه أنا قلت الفلوس الفلوس كل حاجة تيجي بالفلوس ديه إسعاد يونس كانت بتفتري عليا  طيب إحنا كده بنتكلم في موضوع أكبر وهو التربية وديه حاجة مانقدرش نحكم عليها بفلوس أو من غير يعني ممكن تلاقي واحد فقير وعياله متربيين والعكس يعني التربية مش مرتبطة بالفلوس (التربية بمعنى الأخلاق) لكن التربية بمعني توفير المصاريف اللازمة للتعليم والصحة والأكل مثلاً فديه اللي في إدينا نتكلم فيها يعني مش معقول واحد ممعهوش ياكل يجيب 5 و6 عيال سيبك من التربية هيأكلهم إزاي طبعاً مش هايعرف والنتيجة أنه هيحاول يستغلهم عشان يأكلوا نفسهم وهو معاهم وطبعاً العيال هاتتربى في الشارع والنتيجة بنشوفها كل يوم في إشارات المرور وديه بيئة خصبة عشان تطلع كل أنواع المجرمين اللي مش لاقيين طريقة يعيشوا بيها غير أنهم يسرقوا أو يشحتوا في أحسن الأحوال أنا معاكي أن ده نمط تفكير وأن اللي بيعمل كده بتبقى حياته كلها كده طيب دول مش هانعرف نتصرف معاهم وأكيد مش هانموتهم عشان نخلص من الوباء المستشري في عقولهم ده اللي مش منطقي أبداً أني أعمل حملة هدفها أني أشجع الناس اللي مابتعملش كده أنها تعمل زي أخواننا اللي بيظربوا وهما مش قادرين يوفروا لولادهم الحد الأدنى من الحياة الكريمة هنا الموضوع باظ خالص أنا معانديش مشكلة أن واحد يخلف 10 بس يبقى مسؤول عنهم وعن توفير حياة أدمية ليهم يعني مثلاً واحدة زي غادة عادل الممثلة ما شاء الله علي حد علمي مخلفة يجي نص دستة بس هي برضة ماشاء الله متجوزة منتج وتلاقيهم عايشين في قصر فيه دستتين أوض عايزين يملوها طلما هايقدروا يوفروا لولادهم حياة محترمة خلاص محدش يقدر يلومهم حتى لو طلعوا كلهم فاسدين لأننا مانقدرش نحاكم الناس على أسلوب تربيتهم لأولادهم بالنسبة لـ ophilia الموضوع أتجاه قومي طبعاً طاما مؤثر في البلد كلها أنتِ أتكلمتي عن الخدمات طيب أيه رأيك في العيال اللي بتطلع مجرمين بلاش أيه رأيك في أهاليهم اللي بيرتشوا عشان يصرفوا عليهم فيه ناحية سلبية مهمة اللي هي الفساد اللي سببه الأول الظروف الإجتماعية السيئة مقدرش أقول ده أتجاه شخصي الأتجاه الشخصي أني أخلف اكتر طلما أقدر أصرف وأربي __________________ "كثيراً ما تكلمت وندمت أما عن السكوت فلم أندم قط" - أنبا أرسانيوس |
| #20 21st September 2008, 03:47 AM | ||||
| ||||
| موضوع تنظيم أو تحديد النسل يعتمد ببساطة على مستوى المعيشة التى يعتقد الوالدين أنها مناسبة لأولادهم ونظرا لتدنى مستوى المعيشة بمصر وإنتشار الأمية والجهل يصبح المستوى المقبول لدى البعض لايفرق كثيرا عن مستوى الفراخ التى تخرجهم ربة البيت فى الصباح ليأكلوا من الزبالة الموجودة بالحارة. طبعا كل إنسان حر فى أن يفعل مايريده لكن المشكلة هنا تتعدى الأسرة إلى المجتمع والدولة فهذا الطفل الذى أنجبته الأسرة الدولة مطالبة بتعليمه وتطعيمه وعلاجه وتوفير وظيفة له وكل هذا يحتاج أموال طائلة غير متوفرة بمصر فمن الذى سيسدد تلك الفاتورة؟ ربنا؟ بالإضافة إلى إنه غير موجود فحتى لو أفترضنا وجوده فلم يحدث لليوم أن قام بتقديم قروض وإئتمانات مالية لأحد ولايمكن إدراجه كبند فى مصادر الدخل بميزانية الدولة وبالتالى يستحسن إخراجه من الموضوع وعلى من يريد إقحامه فيه فليتفضل لكن بشرط أن يكون كلامه مصحوبا بشيك منه يغطى تلك النفقات. النقطة الأخرى المهمة هى أن تربية الأطفال ليست مجرد مسألة قدرات مالية ولكنها بمثابة حرب إستنزاف للأعصاب والقدرات الذهنية والنفسية والجسدية بالإضافة طبعا للعبء المادى وأنا لاأدرى كيف يستطيع شخص فى هذا العصر الذى نعيش فيه أن يكون لديه 5 أو 6 أطفال ويدعى أنه قادر على تربيتهم اللهم إلا إذا كانت التربية فى نظره إنه يضع لهم شوية غلة فى صحن! مقارنة الوضع بمصر بدولة كالصين يتناسى تماما الفارق الضخم فى الموارد الطبيعية من مياه وأرض صالحة للزراعة وخلافه وعلى رجال الدين وبالذات الشيوخ أن يصمتوا تماما وكفانا مافعلوه بنا وأن يتعلموا ألايتدخلوا فيما لايعنيهم. |
 |
| كلمات مفتاحية |
| حملة, جديدة |
| أدوات الحوار | |
|
|
 حوارات سابقة ذات صلة بموضوع: حملة جديدة | ||||
| الحوار | الكاتب | الساحة | تعليقات | آخر مداخلة |
| أكيد حملة جديدة | Socrates | الميدان الحرّ | 5 | 18th August 2008 04:01 AM |
| اجمل 40 جملة | tigeregypt | الواحة الفنّية | 4 | 19th January 2008 02:14 PM |
| حملة أوقفوا حبس الصحفيين في مصر | mariana | سياسة وأخبار | 0 | 12th October 2007 02:20 AM |
