قيّم هذه التدوينة

5 : ممتاز 4 : جيّد 3 : متوسّط 2 : سيئ 1 : فظيع

أحذروا هؤلاء الرجال الستة

تم النشر في 31st March 2008 الساعة 08:37 PM بقلم ophilia

فى حياة الرجل امرأتان واحدة فاضلة والثانية مثيرة
الفيلسوف اليونانى سقراط يقول( ان المرأة الفاضلة هى زوجتة والثانية هى صديقتة التى سيتخلص منها عند منعطف الطريق )
فعند بداية احساس الرجل بالملل والرتابة والتعود على زوجتة تبدأ الخيانة.....
هناك ستة انواع من الرجال الخائنين ......ولا يمكن ان يكونوا مخلصين ........أحذروهم يا بنات
والكلام دة للكاتبةكارول بوتوينصاحبة كتاب (رجال لا يمكن ان يكونوا مخلصين) واول هؤلاء الرجال هو.....
1-اللرجل( الأنا) النرجسى النزعات فهو رجل يزهو بنفسة ولا يحب الا ذاتة ولا يهتم الا بذاتة وهو فى العادة انسان ناجح اجتماعيا ولكنة يخفى بداخلة شعور بعدم الامان والفراغ الداخلى مما يجعلة دائما بحاجة ليكون موضع اعجاب الاخرين دوما وهو يريد دائما ان يظهر بصحبة نساء جميلات
ولكنه بمجرد ان يمتلك المرأة فسرعان ما يزهدها لانة يحب ان يأخذ فقط ويبحث عن غيرها ليرضى غرورة

حد قابل الشخص دة قبل كدة
باقى الستة انواع من الرجال سيأتى تباعا ان شاء اللة

منشورة في ‏تبويب غير محدّد

مشاهدات 179 التعليقات 20 Trackbacks 0

التعليقات

1. بصى يا أوفيليا.. كبداية.. متقريش لواحدة ست رأيها فى الرجالة ولا تاخدى منها نصيحة.. لا تصاحب الأقرع ولا تاخد منه نصيحة.. لو ربنا بيحبه كان ساب دماغه صحيحة.. مين "كارول بوتو" دى؟ وهل هى ناجحة فى حياتها الزوجية علشان أستفيد منها؟ هل تعاملت مع ال6 أنواع من الرجالة دول علشان تكتسب التجربة دى؟ يعنى على الأقل فهيه محتاجة راجل من كل عينة.. دى لو إتجوزت 6 رجالة والستة كلهم خانوها!! فأعتقد إن فيه حل أسهل من تطليع 6 عيوب ب6 أنواع.. ببساطة تبص لنفسها شوية إحتمال المشكلة فى عيب واحد منها هية.. نمسك أول نوع غتكلمت عنه.. أولاً أى مركب إنسانى سواء رجل أو إمرأة فبيرتكز نفسياً على ال"أنا" وال"هو" مع بعض.. إيه الخط الفاصل اللى أقدر أقول عليه إن ال"انا" مسيطرة غير بالنظر والقياس لل"هو" جنباً إلى جنب؟ سيطرة ال"انا" مش بالضرورة تكون غرور وزهو.. سيطرة ال"أنا" ممكن تكون تسخيف وتسفيه من ال"هو".. العملية نسبية.. وبرضه الكلام ده ماتفرقش فيه سيكلوجية الرجل عن المرأة.. كلاهما فى هذا المعترك سواء.. هاتيلى الكاتبة دى اناقشها لأن كدا هاظلمك معايا.. لأن الإنسان كائن إجتماعى بطبعة.. والميل للجنس الآخر ده طبع إنسانى طبيعى وصحى.. والإختلاف عن الحاجات دى هوه الشاذ وغير الإنسانى.. يعنى أنا بافترض إن أى راجل يحب يكون بصحبة النساء وأى ست تكون بصحبة الرجال.. ده ميل فطرى.. فيه حواجز للحكاية دى بيعملها المجتمع.. لكن انا باتكلم عن الميول والنوايا.. لأن لو توافرت الفرص الإنسان أكيد هاينتهزها لطالما كانت فى النطاق المشروع.. وحكاية إنه يكون بصحبة الجنس الآخر دى داخلة فى النطاق المشروع.. إيه المشكلة فى دى؟ لو باقى الستة بالطريقة دى.. فنقدر نعتبر الكتاب دعوى تحريضية لعدم الثقة بالرجال عموماً..

   تم النشر في 1st April 2008 الساعة 11:08 AM بقلم Mirage Guardian

2. 	قولها ياميراج ياأخويا أنا غلبت معاها كلام طلعت عينى ع الخلف واللى بيخلفوه واللى عاوزين يخلفوا . أوفيليا كملى النص دستة وماتخافيش عمك ميراج زى جدك برضه وتلاقى عنده حكم على طول وخدى الدرر منه على طول ماتنكسفيش انت مش محتاجة عزومة قطيعة تقطع الرجالة ع الستات ع الجنس البشرى كله ينتقم منكم ربنا كشفت راسى ودعيت.خد من قلبى وسر
   	تم النشر في 1st April 2008 الساعة 11:50 AM بقلم مذكرات

3. 	حتى الأنثى فى الحيوان كسفت بنات حوا. *ذكر الثعلب لا يقترب سوى بأنثى واحدة فقط طوال حياته وإذا ماتت تلك الأنثى فان الذكر يظل عزباً طوال حياته أما إذا مات الذكر فإن الأنثى لا تتورع عن الارتباط بذكر جديد.
   	تم النشر في 1st April 2008 الساعة 11:59 AM بقلم مذكرات

4. 	موضوع إناث الحيوانات ده فضائحى للمرأة بكل ما فى الكلمة من معان.. قول لى يا مذكرات يا خويا.. تحب أدعمك بمواقف من حياة الأسد والذئب لتعضيد موقف الثعلب بتاعك ولا نخلى الطابق مستور بدل ما أوفيليا يحصل لها إحباط؟
   	تم النشر في 1st April 2008 الساعة 04:38 PM بقلم Mirage Guardian

5. كبداية.. متقريش لواحدة ست رأيها فى الرجالة ولا تاخدى منها نصيحة.. لا تصاحب الأقرع ولا تاخد منه نصيحة.. لو ربنا بيحبه كان ساب دماغه صحيحة. مين "كارول بوتو" دى؟ وهل هى ناجحة فى حياتها الزوجية علشان أستفيد منها؟ هل تعاملت مع ال6 أنواع من الرجالة دول علشان تكتسب التجربة دى؟ شوف يا عم ميراج هأقول كلمتين ابرك من عشرة يكفى المرأة رجل واحد لكى تفهم جميع الرجال... ولكن لا يكفى الرجل مئات النساء حتى يفهم امرأة واحدة.... برنارد شو بين مائة رجل تجد اثنين او ثلاثة أذكياء ولكن بين مائة امرأة تجد امرأة واحدة غبية ... بص يا عم ميراج لو انا ما قرأتش لواحدة ست امال اقرأ لمين وبعدين مالك كدة بتتكلم عن الستات كأنهم جنس معاق ذهنيا؟... ولية لما انت او اى رجل بيقرأ لراجل ما بنقولش احنا كبنات ما تقراش لأقرع ؟ هوة الرجل جنس ملائكى ونزل الأرض ؟ ولا الرجالة هيتنوهم عايشين اسطورة التفاحة؟ كمان فى حقيقة سيكولوجية بتقول ان النساء فروقها الفردية بسيطة تكاد تكون معدومة اما الرجال ويعينى على الرجال فروقهم الفردية كبيرة جدا ..... وأنت ادرى يا عم ميراج...يعنى الست رجالة او بالاحرى الست انواع من الرجالة دول يا دوب حاجة بسيطة او عينة عشوائية والبقية تأتى ..... أما بالنسبة للاحباط ما تخافش يا عم ياما دقت على الراس طبول ... والصراع الى المرأة عيشاة مع الرجال صراع اصيل من زماااااااااااااااااااااااااااااااااان وصدقنى لو قلت انة صراع لذيذ وصحى على الاقل فى حوار عقلى بين الراجل والست مفتوح... احيانا ما بيكونش عصرى بس مسيرة يبقى احسن....

   تم النشر في 1st April 2008 الساعة 08:22 PM بقلم ophilia

6. اولا كويس انكو قولتو لى موضوع التعلب ده لأنى كنت فاكره جوزى تعلب بس بالمعلومه دى لازم أشوفلو وصف تانى لأن احتمال جوزى يخطب من الستات اللى بيعزو فيا ثانيا أوفى أنثى هى أنثى الأنسان كل واحد يحاول يعمل احصائيه كام ست بتخون جوزها وفى المقابل كام راجل وعلى فكره الخيانه بتتحسب من أول التفكير فى واحده تانيه وكام واحده جوزها بيموت و بعدين بتتجوز تانى و لو ان كان فيه واحده صاحبتى بتقول ده سببه ان مافيش واحده عاقله ربنا يخلصها من التهلكه و ترمى نفسها فيها تانى ايه رأيكو فى الكلام دهِ

   تم النشر في 1st April 2008 الساعة 08:23 PM بقلم kaydahom

7. 	بصى يا كيداهم طالما الرجالة عاجبهم اوى أناث الحيوانات اية رأى الرجالة ما يسبهم من الستات ويشوفلهم معزة تشاركهم حياتهم .....ولا عينى فية واقول اخية
   	تم النشر في 1st April 2008 الساعة 08:59 PM بقلم ophilia

8. طيب كدا عرفنا إن أوفيليا فيمينست رسمى.. بشكل عام أنا لا أعترف بفوارق بين الرجل والمرأة (من حيث القدرات العقلية) غير فى نقطة واحدة بس.. المرأة تفكيرها عاطفى وبالتالى مش أكثر صحة.. الدوغما عندها بتغلب على البراجماتية.. أدواتها هيه الظن والوساوس وحاسة مش عارف إيه وعندى شعور بابصر إيه واللى لازم تنهيهم بالجملة بتاعة "الحاسة السادسة بتاعة الستات اللى عمركوا يا رجالة ما هاتفهموها" كل ده كلام فى الهجايص يا أوفيليا يا بنتى.. بيقود المرأة إنها تكون متاقضة مع ذاتها بسبب أفعالها العاطفية الإرتجالية.. الرجل أكثر حنكة وثباتاً فى الحتة دى.. لوجيك اكتر ومنطقى أكتر وبالتالى كلامه وأفعاله يتكون مسؤولة أكتر.. هاضرب لك مثل بسيط جدا.. فى تعليقك اللى فات: إقتباس: كمان فى حقيقة سيكولوجية بتقول ان النساء فروقها الفردية بسيطة تكاد تكون معدومة اما الرجال ويعينى على الرجال فروقهم الفردية كبيرة جدا إزاى إنتِ - كإمرأة - تكتبى فى نفس التعليق حاجة تانية متعارضة مع اللى فات: إقتباس: يكفى المرأة رجل واحد لكى تفهم جميع الرجال... ولكن لا يكفى الرجل مئات النساء حتى يفهم امرأة واحدة.... ماهو من المنطقى إن لو فوارق النساء تكاد تكون معدومة يبقى واحدة تكفى لفهمهن.. ولو فوارق الرجال كبيرة يبقى مينفعش يتفهموا من راجل واحد.. أعتقد موقفنا ده ممكن يؤكد للقارئ عكس المقولة دى: إقتباس: بين مائة رجل تجد اثنين او ثلاثة أذكياء ولكن بين مائة امرأة تجد امرأة واحدة غبية ... وبالتالى ممكن تفهمى كتير ليه الرجالة بتتعامل مع الستات على إنهم جنس معاق ذهنيا أصل مفيش كائن يبتدى فى إتجاه ويوصل لعكسه فى نفس الموقف غير المرأة.. المهم بس هاتيلى "كارول بوتو" هنا وأنا هاوريها النوع السابع من الرجالة.. يا كايداهم ياختشى إتطمنى خالص على جوزك ومش هايخطب من الستات اللى بيعزوا فيكى ولا حاجة.. مفيش رجل "عاقل" يخوض تجربة الجواز بامرأة ويفكر يخشها برجليه تانى أبداً أبداً أبداً.. أوفيليا تانى وموضوع نشوف لنا معزة.. يا بنتى إذا كان أرقى الكائنات على سلم الأحياء (الإنسان) باظ تفكيره نتيجة كونه إمرأة.. هل من المنطقى الإنسان يبحث عن بديل أدنى درجة؟ برضه كلامك إنفعالى ومش لوجيك.. أكيد طبعاً عند المقارنة بين المرأة والمعزة المرأة تكسب.. بس إنتى شايفة إن المقارنة متكافئة من أى نوع؟ هل شايفة المعزة تصلح كبديل لدورك فى الحياة؟ مش ممكن طبعاً.. إذن فهى مقولة إنفعالية على وتيرة "اللى مش عاجبه يورينا عرض قفاه" بوضع بديل غير منطقى.. سأل أفلاطون معلمه سقراط قائلاً: "هل نتزوج من النساء يا سيدى؟" فأجاب سقراط بجملته الخالدة: "إن تزوجت فإما أن تعيش سعيداً.. وإما أن تعيش فيلسوفاً.. أنت دائماً الرابح"

   تم النشر في 2nd April 2008 الساعة 03:03 PM بقلم Mirage Guardian

9. انا فيمينست انا فيمنست يا حلالا يا حلالا ..... يعنى اية فيمنست ....؟انجليزى دة يا ميراج فيمنست يعنى اطالب بالمساواة بين الرجل والمرأة سياسيا واقتصاديا ودة مش حقيقى ..... اقتصاديا الدين كفل لنا الحرية الاقتصادية...سياسيا مش حلمى خلينا نشوف الرجالة هيوصلونا لحد فين وأظن واضح الانجازات الى حققها الرجالة من بدء التاريخ حتى الان من حروب ومجاعات ولسة هنشوف.... بالنسبة ان المرأة عاطفية وابصر اية ...طبيعة خلقها فيها ربنا وما اقدرش انكرها وكمان طبيعة اكتسبتها من البيئة ...فمثلا يوجد قبيلة اسمها قبيلة الطوارق موجودة فى شبة الجزيرة العربية ورجالة القبيلة دى هى النساء والرجالة بتقعد فى البيت وتربى العيال والادهى والامر ان الرجالة بتغطى وشها اصلهم حلوووين وبيخافوا على نفسهم من الفتنة...!!! يعنى الطبيعة احيانا بيكون ليها يد...اما بالنسبة ان الرجل لوجك ووكلامة افعالة مسئولة كتير ..دةحقيقى الى حد ما... بس بردة فى شواذ للقاعدة دى ...وسيكولوجيا ثبت ان عاطفة الامومة عند الرجل اقوى من المرأة ودة يفسر ترك الرجل لزوجتة لو ما خلفتلوش حتة عيل يشيل اسمة ...!!!!يعنى الرجل احيانا بتغلب علية العاطفة ....!!! يعنى العاطفة والتعقل دة شىء على حسب الموقف... يا بنتى إذا كان أرقى الكائنات على سلم الأحياء (الإنسان) باظ تفكيره نتيجة كونه إمرأة.. هل من المنطقى الإنسان يبحث عن بديل أدنى درجة؟ برضه كلامك إنفعالى ومش لوجيك.. الرجل لو فعلا عقلانى بجد كان زمانة عرف يتعامل مع المرأة...وكان عرف يعامل المرأة ومش طول الوقت يقول انتى مش عقلانية ...انتى عاطفية... من الانصاف انك تعامل المرأة كفرد زية زيك مش فرد درجة تانية وتفتكر ان الانثى ينقصها الكثير عشان انثى سواء كانت انثى انسان او حيوان او نبات دة ما يتفقش مع التفكير الوجيك يا عم لوجيكال....؟ الى نفسى فية مساواة بين الرجل والمرأة اجتماعيا عقليا.... نظرة متعقلة ولا المرأة هتكون دايما حريم لادم ....اقل منة دة حتى القرأن بيقول بما فضل اللة بعضهم على بعض يعنى لكل قاعدة شواذ... وبعدين طالما المرأة ثبت ان عقلها أقل من المستوى اية رأيك نجمع الستات كلها ونحطهم فى اول صاروخ طالع على كوكب المريخ ويخلص الرجالة من هذا الكائن الى هيعطل عجلة التنمية البشرية الى الرجالة قيداها ....وقابلنى لو الرجالة ما اخدتش اول عربية كارو رايحة على المريخ ... بالنسبة لموضوع تناقض الكلام ... يكفى المرأة رجل واحد لكى تفهم جميع الرجال... ولكن لا يكفى الرجل مئات النساء حتى يفهم امرأة واحدة ودة كان رد على الكلام دة...الى انت قولتة يا ميراج... يعنى على الأقل فهيه محتاجة راجل من كل عينة.. دى لو إتجوزت 6 رجالة والستة كلهم خانوها!! فأعتقد إن فيه حل أسهل من تطليع 6 عيوب ب6 أنواع.. ببساطة تبص لنفسها شوية إحتمال المشكلة فى عيب واحد منها هية..

   تم النشر في 2nd April 2008 الساعة 08:57 PM بقلم ophilia

10. ما أنا فاهم يا أوفيليا إنك بتردى على جزئية محددة.. المشكلة أساساً أرد ليه على جزئية بدون نظرة شمولية طويلة شوية فأكتب "جزئيات" كل واحدة منهم زى الفل لكن عند ضمهم فى إطار واحد نلاقيهم ميركبوش مع بعض.. تعرفى إن دى من الفروق الجوهرية بين الرجل والمرأة؟ (مسألة طول / قصر النظر)؟ على فكرة.. كون المرأة أكثر عاطفية والرجل أكثر منطقية ده مش عيب فى المرأة.. ده إسمه إختلاف سمات.. إنتِ حسيتى بإن العاطفة "عيب" لأنها كدا فى مسألة "التفكير" ومسألة "القرار".. هيه ميزة فى أمور تانية مش محتاجة تفكير.. الإختلاف بين الرجل والمرأة فى حد ذاته مينفعش يكون عيب على طول الخط ولا ميزة على طول الخط.. أى خصلة بايخة فى الإنسان هى وجه آخر لخصلة حلوة (والعكس صحيح).. دى من أبجديات علم النفس.. يعنى مثلاً "العناد" (صفة بايخة) هى الوجه الآخر لحاجات زى إصرار ومثابرة وكفاح (صفات حميدة) ومثلاً "حب الظهور" (صفة بايخة) هو الوجه الآخر لحاجات زى الشجاعة والإقدام والرغبة فى التميز (صفات حميدة) طيب أنا هاقول لك على حاجة إختبرتها بنفسى.. إحنا مش قاعدين نقول طول النهار مصر مصر مصر وبلد العراقة والحضارة بتاعة عشرميت سنة؟ ده كان فى نظر واحدة زميلتى من إنجلتراً تعبير عن الغرور والعجرفة وإنعدام ثقافة "إنظر حولك" تلاقى مصر دولة عالم تالت (ولعلمك زميلتى دى بتعشق حاجة اسمها مصر والمصريين.. بس هيه شايفة التغنى بعهد إنتهى نوع من مركبات النقص) يعنى إحنا بنسميها وطنية.. غيرنا بيسميها عجرفة.. ده ناتج لإختلاف الثقافة والنظرة مش لأن ده حلو فعلاً ولا ده وحش فعلاً.. يعنى تخيلى كدا واحد إسرائيلى وقاعد يتغنى بأمجاد موسى وإنهم أول من عرفوا العالم حاجة اسمها شريعة دينية.. ده بالنسبة له فخر بينما بالنسبة ليكى عنطزة فارغة.. المهم اللى عايز أقوله هما كلمتين بساط.. المرأة كائن من أجمل وأرقى ما يكون لو بتتصالح مع نفسها كإمرأة بكل قوتها وضعفها.. وبتكون كائن من أقبح وأدنى ما يكون لو تمردت على طبيعتها دى وحبت تكون قوية بالعافية رغم ضعفها.. أو تستعبط بالتظاهر بالضعف رغم قوتها.. فيمينست مقصود بيها التعصب للمرأة فى أى حاجة وكل حاجة.. حركة تحرير المرأة دى إنتهت من زمان.. دلوقتى أنا بطالب بحرية الرجالة.. بابتدى بحركة تحرير المتزوجين كفئة مقهورة أمام الزوجات.. ولما تعدى المرحلة دى ممكن أفكر فى تحرير الرجال عموماً حتى العزاب منهم.. المشكلة إن العزبنجية حايحنين ومتصربعين على الجواز بسبب الكبت الجنسى اللى عندهم.. مايعرفوش إن الجواز ده أكبر كبت لأكبر قيمة عرفها الإنسان (الحرية) عموماً مسير العازب يتجوز ويجيلنا برجليه يبكى ويبقى من قراء مدونة معالينا بتاعة المتزوجون فى الأرض.. وعلى رأى مذكرات أخويا.. قطيعة تقطع الرجالة ع الستات ع الجنس البشرى كله ينتقم منكم..

    تم النشر في 2nd April 2008 الساعة 10:24 PM بقلم Mirage Guardian

11. المهم اللى عايز أقوله هما كلمتين بساط.. المرأة كائن من أجمل وأرقى ما يكون لو بتتصالح مع نفسها كإمرأة بكل قوتها وضعفها.. وبتكون كائن من أقبح وأدنى ما يكون لو تمردت على طبيعتها دى وحبت تكون قوية بالعافية رغم ضعفها.. أو تستعبط بالتظاهر بالضعف رغم قوتها.. عم ميراج عندك حق فى الشمولية دى....!!! وحلوين الكلمتين بتوع المرأة دول...!!!! بس الى الاحلى الاقناع ...؟ ما هو المرأة لما بتتمرد دة لاسباب كتيرة منها تجاهل الرجل لدورها فى الاسرة وفى الحياة ولتتفيهة لقدراتها ولتهميشة لدور المرأة فى الحياة حتى الاسرية ونشوف بقى الراجل فى بيتة وهو بيتعامل مع مراتة كأنها الجارية الى اشتراها من سوق عكاز بثلاثين درهم ويا سلام لو تشوفة بيتعامل مع زميلة فى الشغل ترى ترى ترى جانتى عايز يظهر امام النساء الاخريات جنتل مان وان كل الى رفضوة فى الشغل قبل كدة لازم يندموا على الكنز الاثرى الى يعادل صباع رجل ابو الهول الصغير وان كل واحدة اتجوزت لازم تعرف انها عايشة مع راس فجلة بالزمة دة لوجك وما تقولش دة شذوذ عن القاعدة لان هى دى القاعدة والى ما بيعملش كدة هوة الشاذ عرفت احنا بنتمرد لية ...؟ المرأة لما بتقابل شخص متوازن مع نفسة ومع الاخرين ويقدر يامن لها حياة نفسية وعاطفية مستقرة نوعا ما لا بتفكر فى تمرد ولا بتعرفة ولا تعرف تفكر غير فى الشخص دة الستات كدة الحب عندهم حياة.... متكاملة

    تم النشر في 2nd April 2008 الساعة 11:27 PM بقلم ophilia

12. 	اللة ينور افحمتية يااوفيليا
    	تم النشر في 3rd April 2008 الساعة 02:13 AM بقلم فتاة مصرية

13. 	مش الهدف الافحام او غيرة يا فتاة مصرية الهدف الحقيقى هو الاتفاق وانا باشوف ان ميراج شخص يستحق الاختلاف اواالاتفاق معاةلان حوارة .........لوجك......!!! ولا اية يا عم ميراج
    	تم النشر في 3rd April 2008 الساعة 03:26 PM بقلم ophilia

14. إقتباس: اللة ينور افحمتية يااوفيليا فيه مثل بيقولوه السوريين "عصفور كفل زرزور.. قال الإتنين طيارين" أعتقد إنه مناسب بدل ما أقول كلام كتير.. يا أوفيليا عقدتى اللى خلفونى.. عايز ألاقى رابط أو فكرة محددة تضم اللى بنتكلم فيه مش لاقى! كلامك أجريسف وبتطلقى رشاش يطال المجرمين والأبرياء سوياً.. قليل من الكلام المسؤول لو سمحتى.. نتبدى برواقة وواحدة واحدة.. 1- إقتطعتى جزء من آخر تعليق ليا.. هل نفهم من كدا إن كل بقية التعليق متفقة فيه؟ ولا ماتقراش؟ ولا مطنشاه؟ ولا إيه العبارة بالظبط؟ موقفك من بقية التعليق إيه لو تكرمتى.. 2- الجزء اللى علقتى عليه نفسه بقى.. كبداية.. شايفك وافقتى مبدأياً وبتحطى مبررات للتمرد.. ماشى.. هاقول حكمة سرابية أبرك من عشرة: الإنسان السوى حياته "أفعال".. الإنسان الغير سوى حياته "ردود أفعال".. مش سيادتك يا اوفيليا اللى عجبتك مقولة أنيس منصور "من اغضبك‏:‏ انتصر عليك‏!‏" إزاى بتقدمى تبريرات للتمرد دون أن تدركى إن ده إعلان فشل؟ 3- مثالك التبريرى لتمرد المرأة (بتاع الزوجة الجارية وزميلة العمل والترى جانتى وصباع أبو الهول اللى رفضوه فى الشغل) كل ده اسمه فى العرف النقدى: "تنظير".. بالبلدى بنسميه كلام مساطب محطوط لإثبات وجهات النظر.. وجهات النظر تبنى على المواقف.. مش أخترع مواقف وأعممها لإثبات صحة نظرتى.. ببساطة شديدة المثال اللى فات ده مبنى على إيه من الحقائق؟ أ) تجربة شخصية مثلاً؟ ب) حكاوى النميمة مع واحدة زوجها كدا؟ جـ) دراسات عاملينها متخصصين وعاملين إحصائيات ولقيوا إن دى حالة عامة فى الرجل؟ (يعنى باعتقد مفيش أبو الهول بره مصر.. ومفيش دراهم عكاظ ودراهم برة المنطقة العربية.. ومفيش فجل غير فى الغيط) د) أوشاعات من بتاعة خالتى وخالتك بتتعاملى معاها كحقائق.. هـ) مصادر أخرى (يرجى التوضيح).. وواحدة واحدة.. إحنا ورانا ايه يعنى..

    تم النشر في 3rd April 2008 الساعة 08:13 PM بقلم Mirage Guardian

15. يا سيد ميراج مثال الراجل اللى ذكرته أوفيليا موجود بكثره بس فى المقابل فى بردهالراجل اللى بيفتح لمراته الباب و يدخلها الأول والراجل اللى بيجيب لمراته ورد من غير مناسبه و الراجل اللى عارف ان الحياه محتاجه رأى مشترك مابينه وبين مراته فلا يسفه رأيها واللى بيبص لزميلته على أنها زميله مش "ست" مش معنى انك يا ميراج لم تفابل النموذج الأول أو أنت يا أوفيليا لم تقابلى النموذج الآخر انه مش موجود وبعدين حكاية ان العاطفه عكس العقل أنا ضد الكلام ده لأن من رأيى معرفة أهمية العاطفه و توقيت اظهارها أو أخفاءها هو ده قمه العقل و يظهر هذا بشكل واضح فى تربيه الأم لأبناءها وكلنا عارفين أن الأم ممكن تقسو فى سبيل المصلحه نيجى بقى لموضوع الزوجه و الجاريه و الدنانير و الحاجات دى هل أنا لما أحاول أسعد جوزى بكل طريقه أقدر عليها أكون جاريه اعتقد ان لو جوزى انسان سوى هيقدر ده ويحاول يسعدنى هو كمان والا اكون أسأت الأختيار ولا ألوم كل الرجال خلق الله فى المرأة كل المتناقضات و هذا هو سر جمالها فهى فى قمة قوتها عندما تظهر ضعفها و تستطيع ان تحرك العالم من حولها بالعاطفه التى تعتبرها بعض بنات حواء تهمه الرجل و المراة لايتساويان ولا يفضل احدهما على الآخر بل يكمل كل منهما الآخر ....................... و هذا مجرد رأى

    تم النشر في 3rd April 2008 الساعة 09:25 PM بقلم kaydahom

16. 	على فكره يا ميراج الناس مش بتتجوز علشان الكبت تخيل انت الموقف ده وقول لى رأيك بعد كده انت بتشرب الشاى فى بلكونة بيتك بعد 30 سنه لوحدك مفيش حد يسأل عليك ولاحد يهمه أذا كنت عايش أو ميت ولا حد يقولك سلامتك ولاحد تنكشه بوجهات نظرك يعنى من الآخر محدش معبرك هيكون ايه رأيك ساعتها بعد انقضاء العمر فى "الحريه"
    	تم النشر في 3rd April 2008 الساعة 09:34 PM بقلم kaydahom

17. يا كايداهم يا أختشى مين قال إنى ما قابلتش النموذج الأول؟ لو فصلتى بين الجد والفكاهة تلاقينه باقوم بالرد على الإنتقائية بالشمولية.. مش بالإنتقائية المضادة.. (دى بيعملوها صبيان حوارات الأديان زى أليكساوى) بوضوح فكونى رافض التنظير مش معناه إن الوضع ده مش حادث.. معناه فقط إنه لا يعمم ولازم ياخد مساحته الحقيقية بدون مغالاة ولا تهوين.. ولما ياخد حجمه الحقيقى هاتعرف أوفيليا لوحدها إن مفيش خصلة رجالى كدا سيكلوجياً.. فيه عقد نقص منتشرة عند الرجل والمرأة الشرقية هما الإتنين.. وصدقينى أكاد أقسم إن تعليقك الأخير من النادر أن يصدر من شرقى عادى عموماً (لأنه متزن) وأراهن إن ليكى إحتكاك بالثقافة الغربية أثرت فى عدم ميلك للمغالاة الشرقية المعتادة.. مازلت مختلف معاكى فى نقطة الكبت.. معظم الناس بتتجوز فى مجتمعنا وغرضها الأول هو أحضان الجنس الآخر (كبت صريح) المثال بتاع البلكونة والشاى تطرق لنقطة "الزواج Vs الوحدة".. طيب مين المسؤول عن الزراعة فى الدماغ إن الوحدة لا تنقضى إلا مع الجنس الآخر؟ يعنى لو الموضوع "وحدة" فقط فكان الموضوع ممكن يتحل بإن الإنسان يعيش مع مجموعة أصحابه (زى ما كنت عايش أنا أيام الجامعة) وأقسم لك إنى مكنتش شاعر بالوحدة ولا بطيخ خالص.. كانت من أجمل أيام العمر حقيقى.. ماهو من الآخر كدا أى راجل ممكن يعيش مع أى راجل وأى بنت ممكن تعيش مع أى بنت.. إيه المحرض لإقامة حياة مع الجنس الآخر تحديداً؟ الإنسان كائن معقد وراقى ومتحضر.. تعبيره عن غرائزة مش بيكون بالصورة الحيوانية الصريحة.. ده كان أيام إنسان العصر الحجرى.. وكان بدرجة أقل فى العصور اللى بعدها.. وأدينا كل شوية بنفلسفها أكتر ونعبر عن الغرائز دى بطريقة أكتر تحضراً.. لو فرضنا إننا فى مجتمع أكثر تحضراً وبيسمح بالصداقة بين الجنسين بجد.. ثقى إن ده هايخفف كتير من الكبت وقرارات الزواج هاتقل كتير.. (دايماً فيه معادلة عكسية بين التخلف وسن الجواز) ولو فرضنا جدلاً إننا فى مجتمع يسمح بالجنس دون وازع دينى أو ضمير يؤرق ويعتبر الموضوع ده حرام أو غلط (يعنى لو خليناها خلطبيطة مع إبتسامة الأسرة والمجتمع وأطيب الأمنيات) مش هاتلاقى الزواج تم أساساً إلا فيما ندر.. هاتلاقى أنظمة أخلاقية وضعية زى البوى والجيرل فرند كبديل للزواج ولن يحدث زواج إلا عند الولادة مثلاً.. والزواج وقتها مختلف خالص خالص عن الزواج بتاع الكبت.. الزواج هنا هدفه استقرار أسرة مكونة فعلاً مش رغبة فى الجنس الآخر..

    تم النشر في 3rd April 2008 الساعة 10:37 PM بقلم Mirage Guardian

18. مش كلام مصاطب يا ميراج .... دة كلام واقعى شوفتة كتير والدنيا اكبر احصائية للى قولتة والموضوع مش معمم على جنس الراجل فى كل مكان لكن يخص الرجل الشرقى اكتر الى نصب نفسة المسئول الاول والاخير عن المرأة ...المرأة مكتوفة اليدين لمجرد انها انثى تعرف ان المفهوم دة سائد عند المتعلمين ان المرأة اخرها البيت والعيال ....؟وانا ما بتفهش دور المرأة فى البيت لانة اساسى لما تسمع تفسير حديث الشريف ( النساء ناقصات عقل ودين) ان الستات ينقصهم العقل والتفكير السليم وكمان دينهم ناقص ...دول المتعلمين امال بقى لو جهلة هيفهموا الحديث ازاى .... المقصود هنا ان البيئة بتأثر فى طريقة تناولنا للحقائق متعلمين مثقفين جهلة..وكمان الثقافة الرائجة...حتى فى .تربيتنا لاولادنا ...انتى بنت ...هوولد ...عيب ...مايصحش .. بالنسبة لحالة الطناش الى انا متهمة بها...؟ انا مش مطنشة بس فى حاجات كتيرة موافقاك فيها....وفى حاجات ...لاوبراحة علينا يا عم ميراج ...وعلى فكرة انا بحب اتعلم من كل حاجة باقبلها ومن كل شخص وخلينا نتعلم منك حاجة...؟ الى مش موافقة علية هو ان الناس بتتجوز علشان الكبت الجنسى لان ممكن العزاب فعلا تحل مشكلة الكبت الجنسى دة ببساطة وبدون زواج وبدون مصاريف باهظة كفاية العلاقات الجنسية الغير مشروعة والى ما بتكلفش حاجة لكن الجواز دة موضوع تانى وزى انت ما بتقول دايماً فيه معادلة عكسية بين التخلف وسن الجواز وزى ما بتقول الإنسان كائن معقد وراقى ومتحضر.. تعبيره عن غرائزة مش بيكون بالصورة الحيوانية الصريحة.. ده كان أيام إنسان العصر الحجرى.. وكان بدرجة أقل فى العصور اللى بعدها.. وأدينا كل شوية بنفلسفها أكتر ونعبر عن الغرائز دى بطريقة أكتر تحضراً.. تفتكر أحنا فى اى حقبة ؟ واذ كان الزواج تعبير متحضر عن الاحتياج الجنسى يبقى نظرتك للزواج محدودة... ولو كان الزواج تطور حضارى لاحتياجات الانسان وفلسفة للغرائز تفتكر الفلسفة دى هتتطور لأية ...؟ ولو كان دة فكر الرجل الشرقى عن الزواج تفتكر فى اسرة متوازنة هتظهر...؟ ولوكان فكر المرأة عن الزواج بالشكل دة تفتكر بيوتنا هتبقى ازاى...؟ انت الى بتعمم قاعدة مش كل العزاب عايزين يجوزوا علشان الجنس ....؟حتى الموحوحين والمصربعين ....الاستقرار اهم بكتييييرتحقيق الذات مع شخص اخر التوحد بين الرجل والمراة اجتماع النقيضين حتى الجنس وسيلة وسيلة وسيلة للحب للتكامل للتوحد مش غاية ومعلش الى يجوز علشان الجنس ما يفرقش حاجة عن اى حيوان بيلبى غريزتة الفطرية ولا اية ...؟ يا أوفيليا عقدتى اللى خلفونى.. اولا انت الى غضبان دلوقتى ...ثانيا انا مش اجريسف ومش ضد الراجل الصح انا ضد الراجل الخطىء الى معظم النماذج الى موجودة فى المجتمع بتمثلة....؟ حلوة معظم دى...!!!؟؟؟؟

    تم النشر في 4th April 2008 الساعة 12:59 AM بقلم ophilia تم التحديث يوم 4th April 2008 في 03:12 AM من قبل ophilia

19. بساء الخير المشكلة التي اراها مبدئيا في الحوار هي رغبه كل طرف في تعميم تجاربه الشخصية ومحيط معرفتة الضيق على انه /انها الحاله العلميه المعممة يقينا وهو ما يتنافى مع ابسط قواعد البحث العلمي السليم والذي يفترض تنوع عينه البحث ومع اتساع التنواع تصبح النتائج اقرب للصحه دون ان نستطيع ان نجزم بصحتها المطلقة. الرجل الشرقي مصطلح مطاط جدا فالرجل الشرقي المصري يختلف في الطباع والجوهر عن الرجل الشرقي السعودي عن الرجل الشرقي اللبناني ........الخ وصولا الى الرجل الشرقي جدا الياباني (اصلي مش مضروب) كما يختلف الوضع بين الرجل الشرقي المصري الصعيدي الذي نشاء في بيئه الارض والعائله وهو محيط احتكاكه دون الخروج الى محيط الحياة العمليه الاخرى من تعليم وعمل خارج نطاق القريه وبين مثيله الذي له مثل هذا الاحتكاك. لذا فتعميم فكرة ان الزواج يمثل للرجل الشرقي مخرج للكبت الجنسي وتلبية لحاجاته الجنسية امر خارج عن الصحة تماما وهنا اقولها من واقع الخبرة الشخصيه والتي ارفض ان اعممها ولكني اضعها في الاعتبار لكوني احد شرائح البحث المفترض ولكوني احد المتزوجين ومع المعلومات المتراكمة والخبرات المكتسبه من المحيط اجزم ان هذا ليس سببا للزواج على الاقل في هذا المحيط حيث انه لا يوجد اصلا كبتا جنسيا ولم اعاني شخصيا منه منذ سن البلوغ وحتى الزواج ولم اقابل من عاني منه فبين الجيرل فريند والتي يحاول البعض ضمنا التشكيك في وجودها وهو انكار للواقع وبين الطرق الكثيرة المتوفرة في عصرنا الحالي لفك الازمة الجنسيه للشباب اصبحت هذه النقطة اقل اهمية في تقييم او اتخاذ قرار الزواج. الا انه على النقيض فان هناك شريحه اخرى لديها التزام ديني / اخلاقي تمنعها من مثل هذه الممارسات مما يجعل الكبت الجنسي احد العوامل التي ترجح كفه الزواج من عدمة. لكن في كلا الحالتين ايضا يكون هناك من يرى في شريكه حياته "زوجتة / صديقتة" مكملا وعاملا هاما في حياته يضيف اليها الكثير من العناصر التي يصعب اكمالها منفردا وهناك من يعتبرها مجرد اداه محدده الاستخدامات فقط. لذا فاني ارى ان امكانية تقسيم الرجل / المرأة الى انماط وطباع محدده بناء المعلومات المحدودوة في نطاق التجارب الشخصية / محيط العائلة والاصدقاء هو امر يصعب تحقيقة. ناتي اذا للرجل التري تري جانتي ونتسائل لماذا لم يات ذكر المرأة الترى ترى سيكسي في العمل فتراها في العمل متالقه تشع بريقا تمنح الجميع ابتسامه ممزوجه ببعض البرأه مخلوطه ببعض الخجل تفوح منها روائح المونت بلانك والافوريا وغيرها من العطور تستطيع ان تاسر قلب اشد الرجال بينما تراها امام زوجها تحمل اعظم 111 يمكن ان تراها مع خليط رائع من روائح البصل والكلور وغيرة وصوت يجعل امنا الغولة كروان ؟ اليس هذا احد الامثلة المقابله لهذا الرجل او لهذا النوع ؟ لذا فذكر نوع دون ذكر مقابلة هو نوع من الانتقائية لتوجية الحوار نحو محور واتجاة احادي مع اغفال عوامل مؤثرة جدا للحديث بقية تحياتي.........

    تم النشر في 4th April 2008 الساعة 01:45 AM بقلم masry

20. شوف يا ابو ميدو الشهير بميراج تعليقى الأخير غير ناتج عن احتكاكى بالثقافه الغربيه بل هو ناتج عن مقوله مش فاكره سمعتها فين "الذكى من يتعلم من أخطاء الأخرين"ومش هنكر بعض القراءات لكتاب غير عرب النقطه التانيه انا لم اقصد وضع الزواج vs الوحده فانا لا أؤيد فكرة الزواج لمجرد الزواج و اذا لم يجد الشخص من يوافقه و يشعر معه بالسعاده فلا يعتبر هذا زواجا فى وجهة نظرى وانما انتقال من بيت الى بيت و العيش مع شخص لا يعنى لك شيئا و بعدين موضوع الكبت ده موضه قديمه قوى يا سى ميراج ياخويا أغلب الشباب النهارده سواء بنات أو ولاد ليهم علاقات و بعدين ماهم فى امريكا مثلا معندهمش مشكله ومع هذا السواد الأعظم من الناس بيتجوز بلا أسباب نيجى للأستاذ مصرى أولا الناس بتكتب يا عربى يا انجليزى انما الميتافيزيقى بتاعك ده بيجبلى صداع ثانيا ايه موضوع انك لم تشعر بالكبت و لاتعرف حد كان عنده المشكله دى ملشى ياسيدى بس أتفق معاك فى جزئيه التقسيم الى انماط سلوكيه زى نظريات علم النفس موضوع الست الترى سيكسى لولا انى عارفه ان مراتك لا تعمل كنت افتكرت انك بتتكلم عنها بس عموما انت هتشرف تشرب الشاى مع الحاج ميراج فى البلكونه بسبب حكاية عدم الكبت دى ربنا يكون فى عونك ابقى خدلك ساتر

    تم النشر في 4th April 2008 الساعة 06:04 AM بقلم kaydahom

Trackbacks

ophilia

• تاريخ القيد بسجلات الدولة Mar 2008
• المداخلات 254
• التدوينات 11

• ابحث في تدوينات ophilia

  التي تحتوي على النص: البحث في العناويين فقط

  بحث مُتقدم
• أبواب المدونة

  • تبويب غير محدّد
• التعليقات الحديثة

  • تحقيق صحفى مع ابليس.... بقلم لا يملك حق المواطنة
  • أحذروا هؤلاء الرجال الستة بقلم kaydahom
  • أحذروا هؤلاء الرجال الستة بقلم ophilia
  • لحظة بقلم ronnyvolcano
  • الحب كالعمر يسرى فى جوارحنا حتى اذا ما مضى لا شىء يبقية بقلم مذكرات
• التدوينات الحديثة

  • فى الحب لا نرفض الوصاية
  • تحقيق صحفى مع ابليس....
  • الوحدة
  • أحذروا هؤلاء الرجال الستة
  • أحذروا هؤلاء الرجال الستة
• آخر زوار المدونة

  • فارس طيبة
  • مذكرات
  • bolbol
  • Gregory
  • kaydahom

• الأرشيف
  <   >  ديسمبر 2008
  Su	Mo	Tu	We	Th	Fr	Sa
  23	24	25	26	27	28	29
  30	1	2	3	4	5	6
  7	8	9	10	11	12	13
  14	15	16	17	18	19	20
  21	22	23	24	25	26	27
  28	29	30	31	1	2	3