نفسى اصورها

الكلمات دى ابدعها صديقى الرائع "حسام" من اجلى فى مناسبة عزيزة جدا عليا..
حبيت انى اشارككم فيها واعرف ارائكم..





نفسي أصورها في خلوتها بترسم بالقلم على الورق عشان أصور رمشها سارح في نعومة رسمتها

-------------------------------------
نفسي أصورها بتختار في حيره ألوان هدومها ، عقدها وتسريحتها
وأحلى لون هو حيرتها
--------------------------------------
نفسي أصور مشطها تايه في ليل شعرها ، ومش عاوز يسيبها
كأنه طفل ماسك في أمه قبل رحيلها
---------------------------------------
نفسي أصور ندم حروف الكلام
لما تخرج من شفايفها
ندمانه طبعا ،
لأنها نسيت تبوس أكتر شفايفها
-------------------------------------
نفسي أصور ورقة سوليفان بتبرق وتهفهف
مع نسمة ربيع شقيه
وهاكتب تحت الصوره
هي دي مشاعرها
-------------------------------------
نفسي أصور أناملها بتلمس زجاج شباكها
كانها بتلمس دنيتها
------------------------------------
نفسي أصورها وهي بتدوب السكر في كوباية ميه
وعيونها بتدوب جوه المنظر
كأنها بتودع السكر
في رحلته او رحلتها
-----------------------------------
-نفسي أصور دموعها في لحظة حنين صادقه
بس مش هاقدر أمسك الكاميرا لحظتها
------------------------
نفسي أصورها لما تثور لقضيتها
تشاور بكفها الجميل
وتجادل خصمها
وترجع تبتسم ببراءتها
----------------
نفسي أصور حذاءها بيدخل في قدمها
بيضحك مع خطوتها
وبيجري في سرعتها
ويدق على الارض من عصبيتها
-----------------------------------
نفسي أصورها لما يحتويها دفء حزنها ، فتنساب عذوبتها
------------------------------------
نفسي أصور ذقنها المنمنم
قدالبندق
لكن له كبرياء
نابع من عزتها
-----------------------------------
نفسي أصور طلة القمر على طلتها
والنجوم تهمس \
ما هي بس حبيبته وحبيبها
------------------------------------
نفسي أصور نقطة الميه بتبلل خدها
أحلى من الندى في حضن ورقة شجره
جنب بيتها
-----------------------------------
نفسي أصورها وهي بترفض تضحك
مع أن حواليها الكل بيضحك
تسأل نفسها
أنا ليه اللي ما بأضحكش؟
ولا هما اللي ليه بيضحكوا؟
ببساطه هي لها فلسفتها
------------------------------------
نفسي أصور صفحات كتابها بين أناملها بتطوح نشوانه
من عبير أنفاسها
أول صفحه اتقلبت،
والتانيه تتمنى تفضل العمر مفتوحه على نظرتها
-----------------------------------
نفسي أصور لحظة قرارها
لما تكتم مشاعرها
تكتم وتكتم
وتصرخ في صدرها الأهه
وأه من وجع أهتها
-----------------------------------
نفسي أصور نغمة بيانو بتداعب حسها
نغمه ورا نغمه بيدخلوا قلبها
ويتصاحبوا جوه مع حلاوة نغمتها
-----------------------------------------
نفسي أصورها وسط الزحام
في السوق
في الميدان
بتتفرج على فستان
أوبتلف من غير عنوان
ويرن موبايلها
كل الدنيا
كل الدوشه
تسكت عشان
تسمع نبرتها
----------------------------------------
نفسي أصور الألم مكسوف وخجلان وبيتألم لما يقرب من ناحيتها
----------------------------------------
نفسي أصور طموحها بيرمح زي الخيل عاوز يلحق خطوتها
---------------------------------------
نفسي أصور غضبها وعصبيتها(ياجمال تعبيرها
زي طفله بضفاير خطفوا منها عروستها
-----------------------------------------
نفسي أصور عيونها بتتأمل في صورة
فيروز
صاحبتها ومطربتها
صوره هتكون حكايه
لأنها حقيقتها
---------------------------------------
نفسي أصورها وهي فرحانه ومزقططه
زي بنوته راجعه من المدرسه
لأمها حبيبتها
---------------------------------------
نفسي أسيب لها الكاميرا،
تصور بيها على راحتها
بس ياترى هتصور ايه؟

ورده ولا سحابه بتجنح على موجتها؟
ولا هتصور
نمله بتهدي"" فتفوتة ""قمح لجارتها؟
ولا هتصور حبايبها؟
ولا هتصور ايه؟؟
ولا يمكن ما ترضاش تحبس اللحظه في اطار مقفول ومتحدد
وترجع لي الكاميرا وهي بتقول لي
ما تخللي كل حاجه أحلى بحريتها
----------------------------------------------------------------