يوم الكشف الطبي.. - دولة أبناء مصر
التقييم: الأصوات 17, المعدل 5.00.

يوم الكشف الطبي..

Submit "يوم الكشف الطبي.." to Digg Submit "يوم الكشف الطبي.." to del.icio.us Submit "يوم الكشف الطبي.." to Technorati Submit "يوم الكشف الطبي.." to AddThisTo Submit "يوم الكشف الطبي.." to Yahoo Submit "يوم الكشف الطبي.." to Reddit Submit "يوم الكشف الطبي.." to Furl Submit "يوم الكشف الطبي.." to Google
تم النشر في 14th January 2008 الساعة 11:11 AM بقلم Mirage Guardian
تم التحديث يوم 14th January 2008 في 11:37 AM من قبل Mirage Guardian (إضافة التبويب)
كلمات مفتاحية التجنيد

منطقة تجنيد اسيوط.. تجمع صعايدة خمس محافظات..
هناك أمضيت يومى الساخر..



جرت تلك الأحداث الدامية فى منطقة التجنيد بأسيوط (مش الهايكستيب بتاع الفرافير) تلك الأحداث التى كلما تذكرتها لعنت اليوم الذى ولدت فيه صعيدياً (ليه يا رب ماخلقتنيش فرفور!)

لأن الصعيدى الذكى ليس خيالاً علمياً.. ومن منطلق اعرف عدوك.. سألت كثيراً على الكشف الطبى قبل ما ادحرج التماسى هناك..
عرفت كل الإختبارات والهدف منها.. كله.. كل شيء.. ووضعت خطط شيطانية لسياسة "عش اليوم لكى تقاتل غداً" بدل سياسة جنودنا أساوس ومغاوير وكلام الشعارات التى لا نراها بل نسمعها في التلفزيون أيام رمضان..

كنت قد ودعت عائلتي وأحبابي وحلقت شعر رأسي: "نمرة واحد"، ورددت سراً تعويذة: "انا رايح بكرة ع الجيش" للمقاتل العربى "وائل كفورى" وأقنعت نفسى بالمغيبات الفكرية على وتيرة مصر أولاً وقبل أى "ضرب".. "عشان كدا احنا اخترناك".. "النيل روانى والفول السوداني".. وعندما كنت أشعر بـ"نصيبة" الواقع.. كنت أشد من عزيمتي بموسيقى "رأفت الهجان" وهؤلاء الكبار ممن سبقوني في التضحية من أجل الوطن..




المشهد الأول
(على البوابة فى منطقة التجنيد)


إستقبلنى عسكرى "أحول" (والله ماهى شتيمة كان أحول بجد) مما بعث فى نفسى الطمأنينة لدقة الإختبارات الطبيه هناك.. جردنى هذا الأحول من جميع أوراقى وأعطانى "كارت أحمر" لأدون به بيانات الطول والوزن ومقاس الصدر من واقع الأختبارات الأولية التى انا مقدم عليها..

ذهبنا كأسراب العصافير المغردة إلى حجرة الكشف الطبى.. وقابلت هناك العسكرى الأحول الثانى..
فتح عينى بإصبعيه عنوة وصب بعض قطرات من مشتقات المغنيسيوم (من وقتها رأيته بأعين غزلانية واكتشفت بأنى أنا الأحول الوحيد والباقى عنيهم تندب فيها رصاصة)

عند مقياس الطول..
أقلعت عن فكرة التراخى عندما رأيت يد تشبه "خف الجمل" تهوى على بطن متراخى قبلى وصيحة قتالية شهيرة "شد نفسك شد"

عند مقياس الصدر..
أنا أميل للنحافة.. إذن الحل أن أكون تحت الحد الأدنى.. فأطلقت زفرة طويلة حملت معها آلام كل الدفعة فى التجنيد.. ونجحت بالفعل فى تخفيض مقاس الصدر إلى 85سم
(يعنى لائق برضه مافيش فايدة.. دي بس حركات تعبر عن الإستماتة في الزوغان المفقود الأمل)

عند مقياس الوزن..
بالطبع لاعب اليوجا المحترف مثلى يستطيع التغلب على الجاذبية الأرضية والتحليق فى سماء غرفة الكشف الطبى زي بتوع فيلم ماتريكس..
لكن - للأسف - يبدو أن الجيش المصرى من "الساموراى" القدامى أو أن غرفة الكشف الطبي من المعابد البوذية المقدسة أو محصنة بتعاويذ قبائل الفودو والسحر الأسود!!
(الوزن زاد خمسة كيلو بفعل يد العسكرى الثالث على كتفى الشمال)

قبل الإنتقال لكشف العظام.. ظهر الفارس الملثم ببزة الصاعقة المصرية وأعينه تشع ضياء بنور أحمر فوسفورى (زى أميجو اللى بينور) وبلهجة مهذبة عذبة تدل على مدى سمو أخلاقيات المقاتل المصرى.. دار الحوار التالى:

- إرجع على مقاس الصدر يا كابتن انت
- أنا خلاص قست الصدر واتكتب يا زعيم
- أنا عارف المكتوب عايز المقرى يا جاهل
- مش فاهم يا باشا

وإذ أرى نفسى طائراً (من غير يوجا بتاعة العيال اللى زيي) بين ذراعيه الملائكية لتستقر قدماى على منصة قياس الصدر مرة أخرى..

- خد نفس عميق إلا هانفخك بمعرفتى
(اللهم انفخنا وفسيهم)

ثم وضع يديه الطاهرتين تحت كفاى الدنيئتين وهتف قائلاً:

- عايزك تقاوم ايدى.. عايز عضلاتك تطق من المقاومة.. انفخ سدرك.. "شد حيلك شد"
(يبدو أنها صرخة قتالية شهيرة عند لاعبى البلى مسافات طويلة)
- ايووووووه .. كدا تمام.. 118سم.. برضه مقاس الصدر الرائع ده كنت عايز تخبيه يا نونوس يا كمونس

لم تعجبنى نظراته.. فأردفت بلماضتى الشهيرة:

- هوه مش الرقم اتكتب وخلاص.. هاتعدله إزاى ده ممنوع؟
- مش هاعدله يا حضرة الظابط

بالطبع أسقط فى يدى عندما ذكر "ضابط" ولعنت لسانى الطويل الذى يسقطنى فى المصائب!
(ظابط = 3 سنين مع النفاذ بدل سنة واحدة عسكري)


المشهد الثانى
(غرفة كشف العظام)


- اخلع منك له يا بن العريان!
(والله كانت على الأم وجعلتها على الأب المسكين لدواعي رقابية)

تقدم شباب (فرفور شوية) و سأل في استحياء الانثي:

- ينفع اقعد بالبنطلون لو سمحت؟؟؟

نظر لة العسكري في أدب شديد ورد بكل هدوء راقي قائلاً:

- لا ياله مينفعش.. لا يا روح أمك ماينفعش..
لازم تقلع و تفضل باللباس.. وإحمد ربنا انك لابسه بدل ما أقلعهولك!


طبعا منظرنا كان شر البلية مايضحك فعلاً..
(شباب زي الورد قالعين ملط إلا ما يستر عوراتهم وشايلين الجزم في إيد والهدوم في إيد)

دخلنا حجرة أوسع ووجدنا زملاء لنا في الكفاح العاري.. كانت هذه هى غرفة كشف العظام..


برغم دراستى لما يبحث عنه الطبيب عندما يطلب الوقوف والرقود واتخاذ جميع الأوضاع.. وبرغم تدريبى لمدة شهر كامل على مظاهر الفلات فوت والأتب والسيقان المقوسة وجميع إنقاذات كشف العظام.. باءت جميع المحاولات بالفشل لعدم النظر من أصله..
(طبعا الحاجات دي بتكون عبارة عن "تمرجي" برتبة "لواء" في الجيش بيمر علينا مرور الكرام.. يعني بيكشف بالنظر كدة)


كشف القلب..
وذلك ما كنت أنتظره بشغف..

من ممارستى لليوجا أستطيع تبطئ معدل ضربات القلب إلى 40 وأحياناً 30 ضربة في الدقيقة..
ولأنى أنسان مهذب وعلى خلق.. فأنا أقف دائماً ويدى خلف ظهرى.. أو بصراحة فهذا ما قد يبدو للطبيب لكنه فى الواقع لأمسك رسغى باليد الأخرى وأشعر بالنبض لكى أصدر نفساً مدروساً مع صوت النبضة لخداع الطبيب وإيهامه بصوت "صمام إرتجاعى"..

كنت واثقاً من أنها حركة جديدة ستنجح لا محالة.. فهى تحتاج لاعب يوجا محترف.. بالإضافة لدراسة طبية حول صوت "الصمام الإرتجاعى".. بالإضافة لقدرة جيدة على التحكم بالتنفس..
من يمكن أن تتوافر فيه هذه الصفات سواي؟
( لا "ماكجايفر" ولا حتي "جيمس بوند" يستطيع أن يفكر فيما يبتكره شاب مصري للهروب من التجنيد الإلزامي )

وصدق توقعى عندما توتر الطبيب الذى وضع السماعة الثمينة على صدرى:

- أنت بتشتكى من حاجة يلاه؟
(أصعب ما فى الأمر التظاهر بالقلق وانت بتركز على الهدوء لتخفيض ضربات القلب)
أجبت وأنا متظاهر بالقلق والجزع كممثل محترف يلعب دور بطولته فى أهم أحداثة المصيرية:

- فيه ايه يا دكتور طمنى هوه أنا عندى حاجة؟؟
أرجوك ماتخبيش.. قولى أنا هاعيش كام ساعة وأنا هواجه مصيرى بشجاعة..


- إركن على جنب لو سمحت.. هات الختامه وبصمه يا فرج..

رقص قلبى طرباً..
إيروكاااااااااا..
لقد فعلتها..
(عاشت اليوجا الروسى نصيراً لمستشقى الصدر)

لكن لم تدم فرحتى سوى ثوان معدودة..
فلقد أتى نفس الكائن النورانى (ذو الأعين الأميجو اللى بتنور أحمر).. وإمتدت قدمه الطاهرة بركلة تسير فى خط منحنى نهايته بطني بكل تأكيد..
وكرد فعل عفوي وغير مقصود لفتى حاصل على المركز الأول في بطولة الجامعات للكاراتية 4 سنوات على التوالي.. إمتدت يداى لتصد الركلة المباركة بالقبضة المزدوجة "جى جى جيدانبراى".. واتخذت قدماى وضع القتال الشهير "كوكتسوا داتشى".. وشق حاجز الصمت صرخة "كي-يااااا" حماسية لا إرادية من لاعب الحزام الأسود
(لتكون بمثابة توقيع أسود عليه وعلى اللى جابوه)



- لااااا يا شيـــــــخ..! بقى عامل لى فيها "بروس لى" فى شبابه يابن القحـ###
(دواعى رقابية)
قلب ايه اللى عندك يا "روح أمك"..
(هيه ماكانتش "روح أمك" بالزبط.. بس دواعى رقابية)

وأمتدت يد الطبيب بالسماعة مرة أخرى على حين غرة..
ولا داعى أن أقول أن ضربات القلب تخطت ال172 بعد فوران الدم إللى لا تهديه لا يوجا ولا نوجا..
لم يسمع الطبيب صوت صمام ارتجاعى.. بل حشرجة نمر مقهور..

(تم ترشيحى فئة ممتازة (أ) بعد ما خلاص كانوا هايبصمونى)


لم يتبق سوى كشف النظر..
صاحبنى ذو الأعين الأميجو اللى بتنور أحمر ودار بيننا الحوار التالى:

- نفسى أعرف انت هاتستفاد إيه لما أخش الجيش بسببك..
- دا أنا مبسوط منك وعايزك معانا..
- إن شاء الله بحركاتك دى مش هاخش عسكرى..
هاخش على طول على رتبة لواء وهاخرب بيتك بإذن واحد أحد..


ضحك مقهقها رغم جملتى "هاخرب بيتك"..
لم أكن أعتقد أنه متذوق جيد للدعابة..أما أخبرتكم أنه ملائكى الطباع؟
سرت لكشف النظر متجنباً مزيداً من اللماضات..

- سته على سته.. اللى بعده..


ما أن هممت بالخروج.. حتى وجدت صاحب الأعين الأميجو اللى بتنور احمر بإنتظارى..
لم أكن أعرف ما سألاقيه بعد كشف النظر.. لكن ما أدركه تماماً أنه لو ظل هذا الكائن الملائكي الطباع بجواري فالمصير حتماً مظلم.. فخرجت من باب آخر لتجنبه وسط صيحات الجميع التى تنادى بالعودة وانا لا حياة لمن تنادى..

وهنا كانت المفاجأة..


المشهد الثالث
(في الشارع)


لم أكن أتخيل فى أبشع كوابيسى أن هذا باب للخروج
وجدت نفسى (عارياً تقريباً) وسط السيارات..
وكل هذا لم أكترث له ولم يكن يشغلني في هذه اللحظة.. فالمصيبة الكبرى أنني لم أشعر بتأثير مشتقات المغنيسيوم اللعينة فى عيناي إلا عندما واجهت ضوء الشمس.. فهذا المحلول الملعون يجعل حدقة العين تتسع بشدة، بحيث صرت لا أستطيع أن أفتح عيناي في ضوء النهار من قوته.. فحاولت بصعوبة الأعمى أن اتحسس الجدار لأدور حول المبنى وأدخل مرة أخرى من الباب الأمامى..
(أطلق لخيالك العنان فى تعليقات أمة لا اله إلا الله اللي شايفين واحد عريان بلبوص في عز الضهر وعايز يلف حوالين مبنى التجنيد ومش عارف يشوف حاجة، فمفيش غير إنه يحسس على الحيطة وهوه بلبوص في شارع زحمة)

بعد ما يقرب من نصف الساعة في هذا الموقف العار.. وصلت للبوابة محطماً الزمن القياسى فى الأولمبياد لإختراق الضاحية معوقين.. رفض العسكرى الأحول دخولى بدون بطاقة شخصية:

- أجيبها منين يا جدع خليك عاقل مانا بلبوص قدامك..
الهباب اللى حطيتوه فى عنيا بامشى لقيت نفسى فى الشارع الله ينتقم منكم..


لم يوافق على دخولى قبل أن يتأكد من وجود البطاقة مع زميله العسكرى (الأحول الثانى) ووعده بدفع الجزية وأنا صاغر ومقدارها: حتة بعشرة جنيهات (حار ونااااار)

ذهبت إلى باقى السرب فى الكفاح العارى يبحث كل منا عن ملابسه.. وكل فرد منا عابس الوجة يتحاشي النظر في وجة زميلة كما مجموعة من الفتيات مكروسة اعينهن جميعاً..

و..

ونستكمل بعدين لضيق الوقت..


منشورة فيكوميديا سوداء
مشاهدات 19815 التعليقات 22
عدد التعليقات 22

التعليقات

  1. Old Comment
    الصورة الرمزية لـ Muslim Copt
    مش عارف اقول ايه غير انى ضحكت من اول سطر لاخر سطر و فى المشهد الثالث و جدت نفسى اقيم التدوينة بخمس نجوم

    لا تتوقف عن الكتابة بعد مقالتين فستحرمنا من كاتب ساخر موهوب جداً
    Comment with Quote
    تم النشر في 14th January 2008 الساعة 06:41 PM بقلم Muslim Copt Muslim Copt نائم
  2. Old Comment
    الصورة الرمزية لـ مذكرات
    بصراحة ياميراج اسلوبك رائع ،بس ياخوفى لتبطل انت كمان او ان المدام تمسكك متلبس بلوحة المفاتيح فى ايدك وانت بتسرد تفاصيل مشوارك وكفاحك .ياريت تكمل وماتحرمناش .
    واحتمال واذ ربما وعلى مايبدو واذ امكن وبما انى مذكرات ويعنى هى جت على انا شكلى هاحصلك واتوكل على الله واخليه اسم على مسمى.صحبتك السلامة ياميراج.....
    Comment with Quote
    تم النشر في 14th January 2008 الساعة 09:21 PM بقلم مذكرات مذكرات نائم
  3. Old Comment
    أسلوبك الفكاهي جيد جدا
    وطريقة سردك اكتر من رائعة .. امال لية مخبي مواهبك دي
    Comment with Quote
    نشرت بتاريخ 15th January 2008 في الساعة 05:39 AM بواسطة واحد وخلاص
  4. Old Comment
    ملكش حل .. بجد كنت بضحك من قلبى
    وده جزات اللى يحاول يزوغ من جيش مصر الهمام
    Comment with Quote
    تم النشر في 20th January 2008 الساعة 09:37 PM بقلم bero bero نائم
  5. Old Comment
    الصورة الرمزية لـ Socrates

    السؤال الذي يفرض نفسه الآن
    هل يستطيع Mirage أن يجد الوقت ليكمل هذه الوقائع
    أشك أن يفعلها وإن كنت أتمنى أن يخلف توقعاتي
    Comment with Quote
    تم النشر في 14th February 2008 الساعة 03:07 PM بقلم Socrates Socrates نائم
  6. Old Comment
    الصورة الرمزية لـ ronnyvolcano
    الحمد لله ان مفيش جيش للبنات عارف اجمل حاجة فطستنى على روحى من الضحك كلمتك
    " الهم انفخنا وفسيهم " انا قلتانك مصيبة ومش سهل
    برافو عليك استمر وامتعنا
    Comment with Quote
    تم النشر في 14th February 2008 الساعة 05:06 PM بقلم ronnyvolcano ronnyvolcano نائم
  7. Old Comment
    الصورة الرمزية لـ eve_y
    بجد يا ميراج اسلوبك اكتر من رائع بالرغم من اني سمعت ماساه الجيش دي قبل كده بس انت في المقدمه و بجداره ....و يار يت تكمل كتابه علي طول و تمتعنا
    Comment with Quote
    تم النشر في 26th March 2008 الساعة 12:44 AM بقلم eve_y eve_y نائم
  8. Old Comment
    الصورة الرمزية لـ Lonely_Shepherd
    طبعاً الموضوع ده بالنسبة لي قديم ....

    انا دي اول مرة اقرا المدونة بتاعتك يا ميراج... ولحسن حظك اني لسة مش ناوي ابلغ عنك المدام....

    طب ياخي دانا افتكرتك هاتجيب سيرتي في موضوع "الثقافة" اياه...
    واهو كل لبيب بالاشارة يفهم....

    انا ناوي ارجع اكتب اليومين دول تاني....
    بس لسة في التليين...

    تحياتي...
    Comment with Quote
    تم النشر في 23rd May 2008 الساعة 09:33 PM بقلم Lonely_Shepherd Lonely_Shepherd نائم
  9. Old Comment
    جامدةةةةةةةةةةةةةةةةةةةةةةةة موووووووووووووووووت
    Comment with Quote
    نشرت بتاريخ 18th November 2008 في الساعة 01:20 AM بواسطة لا يملك حق المواطنة
  10. Old Comment
    الصورة الرمزية لـ جنرال سيزر
    على فكرة يا ميراج انا شوفت الى انتا قولتوا ده وفعلا دى الحقيقة
    Comment with Quote
    تم النشر في 15th February 2009 الساعة 01:39 AM بقلم جنرال سيزر جنرال سيزر نائم
  11. Old Comment
    الصورة الرمزية لـ مواطن مكروش منها
    تصدق بالله
    نفس اللي حصلي من 12 سنه بالحزافير بس مش في الصعيد يابا الحج دي كانت في طنطا
    بس علي فكره في الجيش طنطا من الصعيد من الهايكستب بتاع الفرافير مابتفرقشي
    وده راجع لان شرط اساسي عشان تبقي رتبه في الجيش ان تكون لطخ
    ولطخ عند الفلاحين امثالي
    تعني
    لا يسمع ولا يفهم ولا يسمح له بالتفاهم
    Comment with Quote
    تم النشر في 30th April 2009 الساعة 12:35 PM بقلم مواطن مكروش منها مواطن مكروش منها نائم
  12. Old Comment

    سوال بخصوص الجيش

    لو سمحت ياباشا عايز اجابة محددة للسوال ده يااه يا لا بس هل فى الكشف المبداى بتاع الجيش كشف جراحة نعم ام لا وهل لما انت بتبقى عارف انك داخل الجيش وتروح الحلمية تكشف هل فى هناك كشف جراحة برضو نعم ام لا لان ليا واحد صحبى عنده مشكلة ياباشا فعايز اجابات قاطعة يااه يالا بس ولو فيه كشف بيقى ازاى وبس واسف جدا ياباشا على الاطالة
    Comment with Quote
    نشرت بتاريخ 22nd February 2010 في الساعة 07:30 PM بواسطة لا يملك حق المواطنة
  13. Old Comment
    الصورة الرمزية لـ Mirage Guardian
    "نظرياً"، فيه كشف جراحة أثناء كشف العظام (الكشف اللى بعد تدوين مقاس الطول والصدر على طول)
    بس مطلوب منك تروح للمختص وتعلن عن وجود عملية جراحية تعيق تأديتك للخدمة
    لو تم أخذ بصمة لصديقك، فده معناه "غير لائق طبياً" أو تحويله للفئة (ج) المختصة بالأعمال الكتابية دون تأدية تدريبات اللياقة أو الطوابير الشاقة.. ده متوقف على تقييم الطبيب لطبيعة العملية الجراحية

    "عمليا"، ده بالأغلب مش بيتم، وإن تم بيتم بالمستوى (ج) في حين إن الموضوع مثلاً أخطر

    وقتها لازم زميلك يقدم "تظلم".. ميمشيش من غير ما ياخده
    هياخد توقيت لزيارة تانية جوه نفس منطقة التجنيد التابع ليها.. وبالأغلب هايثبتوا نفس التقرير الطبي الأول لأنهم أصدقاء مهنة..
    صديقك برضو لازم يصر على التظلم للمرة الثانية، ووقتها سيتم تحويلة للكشف بالمنطقة المركزية (حلمية الزتون)
    وهناك هياخد حقه بحسب طبيعة العملية الجراحية اللى عملها

    بالتوفيق
    Comment with Quote
    تم النشر في 25th February 2010 الساعة 02:05 AM بقلم Mirage Guardian Mirage Guardian نائم
  14. Old Comment
    معلشى ياباشا لو هطول عليك اللى فهمته من كلام حضرتك ان مفيش كشف جراحة فى الكشف المبداى عمليا الا اذا انت قولت انك عندك حاجة ومفيش برضو فى الحلمية الا اذا انت قولت برضو انا فاهم صح ولا ده فهم خاطىء واسف ياباشا لو كنت طولت على حضرتك
    Comment with Quote
    نشرت بتاريخ 25th February 2010 في الساعة 10:06 PM بواسطة لا يملك حق المواطنة
  15. Old Comment

    مدونه اجراءات التجنيد

    السلام عليكم ورحمه الله وبركاته
    موضوع جميل جدا واسلوبك راااااااائع فعلا في الكتابه
    اتمنى انك تزور مدونتي المتواضعه عن اجراءات التجنيد وتقولللي رأيك
    http:\\eltagnid.blogspot.com
    Comment with Quote
    نشرت بتاريخ 11th April 2010 في الساعة 04:27 PM بواسطة لا يملك حق المواطنة
  16. Old Comment

    يوم المهنة الطبي الرابع

    عن يوم المهنة الطبي....إليكم هذا الخبر.... معالي وزير التعليم العالي يفتتح فعاليات يوم المهنة الطبي الرابع فى مدينة الملك عبد العزيز الطبية بالحرس الوطنى بالرياض
    ..... .للمتابعة أدخل هنا
    http://www.ngha.med.sa/ARABIC/MEDIACENTER/NEWS/Pages/default.aspx?pageID=6
    Comment with Quote
    نشرت بتاريخ 7th July 2010 في الساعة 03:59 PM بواسطة لا يملك حق المواطنة
  17. Old Comment
    الصورة الرمزية لـ Mirage Guardian
    يا عم بنقول منطقة تجنيد أسيوط! تقول لي الرياض؟
    يا "مسّي" إنتو عندكو جيش وتجنيد وعساكر وكدا يعنى زينا؟
    Comment with Quote
    تم النشر في 10th July 2010 الساعة 08:10 PM بقلم Mirage Guardian Mirage Guardian نائم
  18. Old Comment

    سؤال لازم

    ماذا عن كشف التناسلي والشرجي هل لازم ام اكيد ولا انا اقاهم وهل لو ماقلتلهمش ممكن اخش الجيش علي كده؟ ارجوكم افيدوووني
    Comment with Quote
    نشرت بتاريخ 5th August 2010 في الساعة 09:15 PM بواسطة لا يملك حق المواطنة
  19. Old Comment
    الصورة الرمزية لـ Mirage Guardian
    لازم تقول لهم.. محدش بيكشف ع المناطق دي إلا بناء على طلبك لكدا..
    بس أتذكر إن كان فيه واحد معانا في الدفعة عنده "خصية معلّقة"، وجايب تقارير طبية، ورغم ذلك ليقوه طبياً..
    في كل الأحوال لو عندك مشكلة صحية سواء دي أو غيرها فهايعملوا كدا ولازم تصر وتعمل تظلم (راجع أول مداخلة ليا في الردود لمزيد من التفاصيل)
    Comment with Quote
    تم النشر في 1st September 2010 الساعة 08:37 PM بقلم Mirage Guardian Mirage Guardian نائم
  20. Old Comment
    تمام كلامك انا معاك من اول وتانى طبيعى دا بيحصل وانا وانا فى الكشف الطبى كان بيحصل معانا اكتر من كده مش زى ما قال للفرفور باللباس بس لا احنا كنا بندخل الكشف سلط ملط اه كل واحد لوحده فى غرفه كشف الحما....D: بس سلط ملط زى الجيش الامريكى كده كايوم ولدتك امك
    اللباس والبكسر ده بيبقى نازل مغطى كعوب رجلك بس وسايبك من فوق

    بالنسبه للمشهد الثالث انك تخرج من باب تلاقى نفسك فى الشارع وسط السيارات دا كده دا مش جيش دا دوره مياه عمومى
    وانا مش معاك فى النقطه دى وازاى انت تخرج ومفيش حراسه او عسكر واقفين على الباب ايه سداح مداح

    وترجع تدخل تانى من البوابه دا مره حصلت وواحد استظرف نفسه وفكر ينط من على السور مسكوه اكلوه تراب الميدان اللى كنا وقفيين فيه ولو دا حصل معاك يبقى عندكوا نظام فرافير انا بقى تبع المنصوره مش اسيوط وحصلنا اكتر من اللى حصل معاك ده
    Comment with Quote
    نشرت بتاريخ 2nd November 2011 في الساعة 12:52 PM بواسطة cpt.maged
  21. Old Comment

    nice

    أسلوبك ملهش حل صراحة
    Comment with Quote
    نشرت بتاريخ 12th July 2012 في الساعة 11:49 AM بواسطة لا يملك حق المواطنة
  22. Old Comment
    أنا قبل ما اروح الكشف الطبى .. كنت بدور على النت على مقالات تعرفنى هو أيه اللى هيحصل بالظبط .. قرأت المدونة دى والله يا ميراج نسيت الرعب والهلع والخوف اللى هشوفه كمان أسبوع وفضلت أضحك أضحك أضحك .. وبعد الأسبوع رحت والحمد لله أخدت اعفا من الجيش .. وأزعم ان المدونة دى وشها حلو عليا وليك الحلاوة ان شاء الله .
    Comment with Quote
    تم النشر في 2nd June 2013 الساعة 03:08 AM بقلم  نائم
نشر تعليق نشر تعليق

SonsOfEgypt.Net is certified by Norton SafeWeb SonsOfEgypt.Net is certified by McAfee SiteAdvisor
Sons Of Egypt Network v13.8.77
يسمح بالنقل خارج الموقع دعماً لمجّانية المعرفة
شكراً لمن أشار للمصدر