هما الأهلاوية هاجروا من الدولة ..!

[mariana]

تماشيا مع نظرية المؤامرة زى ما شرحهالنا أخونا العزيز أمون
فأنا باعتقد جدا إن الأهلاوية فى هذه الدولة مستهدفين
و اعلم تمام العلم إن فى مؤامرة تحاك بين صفوف الزملكاوية المفروسين ضد الأهلاوية الكسبانين
وكل أهلاوى فى الأقوى منه ..
وفوضت أمرى لله فيك يا زمالك ..

إمضاء زملكاوية مفروسة ..

** نسيت أقول لكم مبروك ..

[Man of Honor]

[mariana]

شايفين .. أهو واحد مسكوه متلبس وفى أيديه أداة الجريمة ..
أنا نظريتى ما تخيبش أبداً

[Muslim Copt]

الاهلاوية مهاجروش ولا حاجة بس اصله طبيعى ان الاهلى يغلب الزمالك وطبيعى ان لعيبة الزمالك ترفع الجزم و تقل ادبها مفيش جديد علشان الاهلاوية يتكلموا فيه

[غلاباوي]

احنا كأهلاوية اتعودنا على هزيمة الزملاكاوية بكل بساطة ويسر ... واسألوا اي مشجع اهلاوي بيكون داخل يشجع وهو عارف ان اضعف الايمان ان الاهلي هيكسب 2- صفر ...

يعنى هزيمة الزمالك من الاهلي بقي شيء روتينى جدا زي تعاقب الليل والنهار ....
مفيش اي جديد

[kifak-inta]

انا اهلاوي
و برضه الاهلي وحش
و ياخوفي عليه في افريقيا

[Raheel]

توثيقاً لما قيل بواسطة Muslim Copt

الاهلاوية مهاجروش ولا حاجة بس اصله طبيعى ان الاهلى يغلب الزمالك و طبيعى ان لعيبة الزمالك ترفع الجزم و تقل ادبها مفيش جديد علشان الاهلاوية يتكلموا فيه

الجهل دائماً أفضل من نصف الحقيقة

عندك حق يا مسلم قبط
لعيبة الزمالك بتقل في أدبها
إنما لما جمهور الأهلى يشتم لاعب زمالكاوي لازم اللاعب ده يخليه هادي ومايستفزش
ولما لاعب من الاهلي يتدخل ويكمل الإستفزاز في لاعب زمالكاوي جمهور الاهلي عمال يشتمه بامه وأبوه يبقى لاعب الزمالك المفروض عليه برضه مايردش علشان مايبقاش قليل الادب مع

جمهور ولاعبين أهلاوية محترمين فوق الوصف

ويرجعوا يقولوا البلد بايظة ليه ماهو من طريقة تفكير أهلها بصراحة ماشفتش بجاحة اكتر من كده يا مسلم قبط يعني انت شفت الجزمة مرفوعة يبقى علطول اللاعب ده طبيعي يقل أدبه لانه زمالكاوي
### ان كنت تجهل ان جمهور الاهلي يستفز في شيكابالا من أكثر من تلات ماتشات وقلت رايك ده من غير ماتعرف يبقى كان لازم على الأقل تشك للحظة ان ممكن يكون الاعب ده اتعرض لاستفزاز قبل ماحضرتك تقف وتقول انه طبيعي يقل في ادبه
اما بقى لو كنت سمعت الشتيمة بودنك وبرضه قلت ان اللاعب طبيعي يقل في ادبه تبقى ###


بصراحة انا عن نفسي اشك في انك ماسمتعش الشتيمة لان الكل سمعها

بالمناسبة في يوم سألت واحد من جمهور الاهلي هو ليه اتحاد الكورة مابيوقعش عقوبة على فلافيو علشان اعتراضاته المتتالية على الحكام وتشويحه -لدرجة انهم وعدوه الماتش اللي جاي هاينزلوه لاعب وحكم في نفس الوقت علشان يحكم لنفسه الحاجات اللي هو شايفها- رد عليا وقالي هو ممكن يكون بيشتم فعلاً بس علشان اتحاد الكورة مابيعرفش اللغة اللي بيشتم بيها فمايقدرش يديله عقوبة زي عقوبة عمرو زكي لما شتم

قلتله ونعم المبدأ يا شعب كله عقل ومباديء وجمهور لنادي محترم

[Muslim Copt]

جمهور ولاعبين أهلاوية محترمين فوق الوصف

شكراً جداً على حيادك و اعترافك بالحق

بصراحة انا عن نفسي اشك في انك ماسمتعش الشتيمة لان الكل سمعها

فى الحقيقة مسمعتهاش بس استنتجت ان الجمهور شتمه ده شىء انا مش معاه طبعاً بس اى حد ليه علاقة بالكورة عارف ان الموضوع ده بيحصل كل يوم فى ملاعبنا و اللعيبة متعودة عليه بعضهم بيقابله بطريقة محترمة جداً تخجل الجمهور و تجعله يحترمه و يتوقف عن شتيمته و البقية بتتجاهله تماماً و لو كل لاعب اتشتم عمل زى شيكابالا كان زمان الكرة فى مصر وقفت من زمان واضح ان الهزيمة افقدتك هدوئك المعتاد يا رحيل مفيش لاعب فى الاهلى او فى الزمالك او حتى فى مركز شباب متعرضش للشتيمة من الجمهور سواء كان جمهور الفريق المنافس او جمهور فريقه هو لما بيلعب بشكل وحش المهم انه مينفعش يترد على الجمهور بالشكل ده المنظر ده لو حصل فى اى بلد ليها اتحاد عريق كان زمان اللعيب ده اتبهدل و الموضوع فعلاً مش جديد من الزمالك اذا كان رئيس النادى نفسه مرة عملها و تقريباً كل اللعيبة اللى فى النادى ليهم سوابق
اما فلافيو فمن حق اى حكم انذاره لو شاف انه بيعترض بشكل غير مناسب مش ذنب الاهلى ان الحكام مبيقوموش بالدور اللى انت شايفه مطلوب منهم و يا ترى المفروض فعلاً بالشبه كده اتحاد الكرة يعاقب فلافيو على كلمة ممكن تكون صباح الخير بالبرتغالى و حضرتك عارف انه ممكن اللاعب يشتم بمنتهى الهدوء او العكس
علشان كده الحكم لما اللاعب يكون بيتكلم بلغة اجنبية عليه بيحاسبه على النبرة و الطريقة و التقدير بيكون للحكم وحده

اما بقى لو كنت سمعت الشتيمة بودنك وبرضه قلت ان اللاعب طبيعي يقل في ادبه تبقى ###

فى الحقيقة مسمعتش لكن استنتجت زى ما قلت اعتقد انى بالتأكيد مدلس

[Raheel]

زميلي اسمح لي أن أكون مختلفاً بعض الشيء عن ذي قبل

فانت مازلت تمارس ### خلط جميع الأوراق بعضها البعض وتخرج بنيتجة أعجب من أحكام حََكَم مباراة أمس

لنرى كيف يمكنك انت أن تحلل كلمتك
1- -طبيعي ان لعيبة الزمالك تقل ادبها ده شيء مش جديد
وكأن نادي الزمالك يشترط في من يلعب في صفوفه قلة الأدب او لو كان غير ذلك يتم إعطاهم دروساً في قلة الأدب فأصبح من الطبيعي ان نرى قلة الادب من لاعبين الزمالك -ألا ترى في كلمتك أية عنصرية من تلك التي ترفضها في حوارات الاديان ؟-
مرحي يارفاق لقد أفاض علينا مسلم باكتشاف جديد وهو ان قلة الادب طبيعية في نادي الزمالك

2 - واضح ان الهزيمة افقدتك هدوئك المعتاد يا رحيل
أراك فقط تنتهج نفس النهج البغيض الذي تستنكره في حواراتك العاقلة الدينية -تحولت على الفور للحديث عن الهزيمة والتي لم تكن أيداً محور حديثي معك إلا لأنك ###

خلطاً رهيباً بين الإنفعال والقسوة لا يأتي من شخص في حجم وقيمة عقلك في الحوارات الدينية عندما افترضت اني قد افتقدت الهدوء في مداخلتي معك مع اني هادئ جداً وان ماجدث مني في المداخلة السابقة هو مجرد استنكار رهيب -ظهر في شكل كلمات قاسية- لشخص ###

معذرة ولكني أراك تشير بكلمات غير مباشرة إلى إنتمائي إلى نادي الزمالك وبحثت داخل مداخلتي عن شيء يشي بذلك فلم اجد .هلا تدلني من أين أدركت إنتمائي ### ؟

3- المزيد من سباب الجماهير يجب أن يقابل بهدوء من اللاعب
ياسيدي وهل هناك مبدأ قانوين تشريعي في أي قانون مدني/دين إلاهي يعاقب من تحمل كثيراً وفاض الكيل به انه لم يتحمل أكثر ويصبر أكثر على الإيذاء فبهذا المبدأ يصبح حكمك بطبيعية ظهور قلة الأدب من لاعبي الزمالك

###
أوصبر اللاعب اكثر من مرة على إيذاء الجمهور له وعدم الرد عليهم بالمثل هو واجب مفروض عليه وعندما يفيض به الكيل مرة ويرد عليهم بجزء يسير من فعلهم البعير يصبح حكمك عليه بان قلة الادب طبيعية في أبناء ناديه
أراك تتناسى ان اللاعب هو إنسان وليس آلة او طاقة رياضية فقط
###

أما عن حيادي واعترافي بالحق فساترك القارئ يرى هل هو إعتراف فعلاً ام انه سخرية مريرة من أشكال تعيث جهلاً وتبجحاً في الأرض الطيبة

شيء آخر فعلا نعم يحدث كثيراً ان يشيح احدهم بكلتا يديه في وجهك ليقول لك صباح الخير
ألم أقل لك شعب كله عقل ومبادئ
-الكيل بمكياليين واضح فالموضوعية والحيادية تجبرنا دوماً ان يكون عقاب المخطئين واحد في كل الاحوال بغض النظر عن مدى علاقتنا بهم-
هنيئاً لك يا زميلي بمواهبك الفذة

[Man of Honor]

يا رحيل انت غلطان

ايوة غلطان ،انك ترد عليهم
دول تسيبهم كدا ومتردش عليهم احسن والله
اصل الاطر مختلفة بينا وبينهم "مع الاعتذار لزميلنا بهجت"
اطار الاهلاوية ،المكسب بس ،بغض النظر عن الاداء او الكورة الحلوة في الملعب
طول عمر الاهلي بيلعب عشان يكسب بس ،وطول عمر جماهيره مش بتبص الا للمكسب بس
والزمالك اهم حاجة عنده واطاره الكورة الحلوة والفن والهندسة ،وبالتالي لما الزمالك خسر امبارح مزعلناش لانه خسر ولكن لانه لعب وحش على الرغم انه لعب احسن من الاهلي
ولما الزمالك قبل كدا لعب كويس وخسر ،والجماهير هنأت اللاعيبة على الاداء الجميل ،الاهلاوية استنكروا دا اوي ،وقالوا يا عيني جماهير الزمالك من كتر الهزيمة جالهم احباط وبقوا يفرحوا للخسارة
معذورين ،ومتوقع منهم انهم يقولوا كدة لان ببساطة اطارهم هو المكسب بس
ودة واضح انك كل لما تقابل اهلاوي اليومين دول ،تقولوا دة انتو ملعبتوش المتش كله زمالك ،يقولك بس كسبنا
كسبنا ولا مش كسبنا ،هو دة التكتيك
بس للاسف ان التكتيك دة ممكن نتقبله في متشات كؤوس ،زي ما ايطاليا بتعمل كدا،لكن في دوري ولسه في أوله معتقدش
الحاجة الوحيدة اللي فرحتني في المتش ان جوزيه نازل المتش مرعوب من الزمالك ،ودة كان واضح اوي في التشكيلة اللي عملها فكان بادئ المتش بخطين دفاع ،فغير خط الدفاع التقليدي ،كان خط النص عبارة عن خط دفاع تان ،متمثل في حسن مصطفى ،حسام عاشور ،انيس بو جلبان وبعدين طلع حسن مصطفى ونزل مدافع صريح وهو وائل جمعه


بالنسبة لمشكلة شيكابالا ،فدة مش اول مرة تحصل ،جمهور الأهلي هاجم شيكابالا في متشين قبل كدا
ففي مباراة الدور الثاني العام الماضى ،بدأت الجماهير في مهاجمة شيكابالا ،ولكن سرعان من اسكتهم شيكابالا بصنعه للهدف الأول الذي احرزه تامر عبد الحميد
وفي مباراة الكأس هاجمت تلك الجماهير شيكابالا ،قبل المباراة ،واثناء قيامه بعملية الاحماء قبل نزوله ،وبمجرد نزوله اخرس شيكابالا تلك الجماهير بأحرازه هدفه الرائع
ولكن لسوء حظه هذه المرة ان لم يحرز او يصنع اي اهداف،فلم تكف الجماهير عن مهاجمته طوال المباراة وقبلها وبعدها
فما فعله كانت نتيجة طبيعية لاستفزازه ،وان كان بالغ بعض الشئ في ردة فعله
أنا شخصيا لو تعرضت للاستفزاز اللي هوا اتعرضله دا والشتيمة بالاهل ،فالجزمة هي اقل واجب ،لاني عارف ان في ناس مبتجيش غير بالقديمة
جماهير نيوكاسل هاجمت ميدو في مباراة فريقه ضد نيوكاسل مرددة'Mido, he's got a bomb you know
Mido, you've got a bomb, Mido
Mido is a paedo
وسرعان ما احرز ميدو هدف يشبه إلي حد كبير هدف أبو تريكه حتى في الشك حول كونه تسلل ،ثم توجه ميدو الي الجماهير وصاح بهم مطالبا اياهم بالسكوت ،ويحقق الاتحاد الانجليزي في تلك الواقعة لتوقيع عقوبات على جماهير نيوكاسل بسبب هتافاتهم العنصرية!!!